Қазақстан Республикасының Тәуелсіздігінің 30 жылдығына және "Кит-Край" спорт клубының ашылу құрметіне орай Атырау қаласында каратэ-до кекушинкайдан балалар және жасөспірімдер қыздар арасындағы Батыс аймақтық ашық турнирі өткен-ді.
Турнирге Атырау, Орал, Жаңаөзен, Ақтау қалаларынан және Маңғыстау облысынан 300-ден астам спортшы қатысты. Аталған турнирде Махамбет ауданының каратэшілері де табысты өнер көрсетіп, жүлделі орындарға ие болды.
Махамбет аудандық каратэ-до кекушинкай клубының мүшелері, Жалғансай ауылының кішкентай спортшылары 1 алтын және 1 қола медальды қанжығаларына байлады. Атап айтқанда, 6-7 жас аралығында 20 келіге дейінгі салмақ дәрежесінде Ілтипат Асхатқызы 1 орын иеленсе, Захида Сағынбай 3 орынға қол жеткізді.
Ал жоғары жас аралығында жекпе-жек өткізген қос спортшы, нақтырақ айтқанда 12-13 жас аралығында 40 келіден жоғары салмақ дәрежесінде Шұғыла Самат пен 12-13 жас аралығында 40 келіге дейінгі салмақта Аряна Сәлімгерей барлық қарсыластарынан басым түсіп, турнир чемпионы атанды.
Осылайша, Айгерім Айшуақова жаттықтыратын каратэші қыздар аудан, облыс намысын абыроймен қорғап, жан-жақты дайындықтың арқасында тағы бір белесті бағындырды.
Қ.АЙТҚАЛИЕВ
