Өрт - тілсіз жау. Әсіресе, жаз айларында орман-тоғайда, кең өлкеміздің табиғатында өрттің шығуы жиі кездеседі.
Қауіпті өрттің туындау себебі неде? Жаз шығып, күн ыси бастағанда, қыстай қар астында жатқан қураған шөптер орман-тоғайға өрт қауіптілігін туғызады. Жеке шаруа қожалықтары көктемгі егіндіктің орнын дайындап, мал жайылымын тазартамыз деп, былтырдан қалған шөптерді өртейді. Ал өрт жүздеген, мыңдаған гектарға жетіп, орман-тоғайға өтеді.Бұған қоса адамдардың орман-тоғайда өртке қарсы ережелерді білмеуінен немесе білсе де өртке қарсы ережелерді сақтамауынан орын алады.
Демалушылардан кейін өшірілмей қалған от алаулары, автокөлік пен тракторлардан шыққан ұшқын, сөндірілмеген темекі қалдығы дала өртінің басты себебі болып табылады. Осының салдарынан қурап тұрған шөп тұтанып, үлкен өртке айналады. Өрт шыққан сәтте жел соғып, дауыл тұрып, қас-қағым сәтте үлкен алқап жанып кетеді. Өткен жылдан қалған шөпті өртеу дала өртіне ұласатындықтан халық арасында үгіт-насихат жұмыстарын жүргізудің маңызы зор. Өрттің құрбаны болмас үшін қандай алдын алу шараларын жүргізу керек? Орман-тоғайға демалуға барған демалушылар сөндірілмеген темекі қалдығын, жағылған сіріңкені тастамай, от алауын өшіріп,артына ешқандай із қалдырмай барлық қоқысты өзімен жинап алып кетуі керек. Мұны әр адам өздерінің парызы ретінде санауы қажет.
Рүстем ЖАҚСЫЛЫҚҰЛЫ, Махамбет ауданының Төтенше жағдайлар бөлімінің аға инженері, азаматтық қорғау капитаны