Құрманғазы атындағы мәдениет сарайында мемлекеттік қызметшілер арасында өткен "Мемлекеттік тіл - мемлекеттік қызметте" атты облыстық байқауға ауданымыздан қатысқан «Жұмыр қылыш» командасы бас жүлдеге ие болды.
Байқау тілдерді дамыту мен қолданудың 2011 - 2020 жылдарға арналған мемлекеттік бағдарламасын жүзеге асыру бағытында, тілдерді дамыту басқармасының ұйымдастыруымен өткізілді. Негізгі мақсаты - мемлекеттік тілдің қолданылу аясын кеңейту және дамыту, ана тіліміздің мәртебесін арттыру, мемлекеттік қызметшілерді ынталандыру. Сайысқа барлығы 30-ға жуық мемлекеттік қызметші қатысты. Қатысушылар үш кезең бойынша сынға түсті. Алғашқы айналымда өздерін таныстырса, екінші айналымда диалог құру арқылы көріністер қойды. Ал, соңғы кезеңде ақын-жазушылардың шығармаларынан үзінді оқыды. Тынымсыз еңбек пен үздіксіз дайындықтың арқасында қарсыластарынан оза шауып, бас жүлдемен оралған "Жұмыр қылыш" командасы ауданның атағын аспандатты.
Б.Сүйеуова.
