Ақтоғай ауылдық округінде 200 орындық мәдениет үйі пайдалануға берілді.
Аудан әкімінің орынбасары Света Ертілеуқызы ақтоғайлықтарды құттықтап, ардагерлер кеңесінің төрағасы Толыбай Базарбаевпен бірге жаңа нысанның лентасын қиды. Ауыл ақсақалы Тілеген Аманшалов жаңа мектеп мен балабақшаның халық игілігіне берілгеніне, енді талантты жастардың өнерлерін шыңдауына септігін тигізетін мәдениет үйінің ашылғанына шексіз риза екенін білдірді. Сондай-ақ, тұрғындар атынан нысанның құрылысын мерзімінен бұрын аяқтаған «Грандмастер» ЖШС-не алғысын жеткізді.
«Грандмастер» ЖШС өкілі Қуаныш Бимағамбетовтің айтуынша, серіктестік Махамбет ауданы бойынша бірнеше нысанның құрылысын жүргізіп жатқан көрінеді. Мәдениет үйінің құрылысына қаржы Атырау облыстық құрылыс басқармасынан бөлінген.
Б.Сүйеуова.
