Аудандық орталық кітапханада Ұлы Жеңістің 80 жылдығына байланысты «Көңіл көзімен көр!» атты әлеуметтік-зияткерлік сайыс ұйымдастырылған еді. Бұл сайысты «Қазақ соқырлар қоғамы» қоғамдық бірлестігі филиалы аудандық білім бөлімімен, З.Ещанова атындағы балалар өнер мектебімен бірігіп өткізген-ді. Әлеуметтік-зияткерлік сайысқа «Қазақ соқырлар қоғамы» ҚБ-не қарасты мүмкіндігі шектеулі азаматтар мен оқушылар белсене қатысты.
Сайысты «Қазақ соқырлар қоғамы» ҚБ филиалы өкілі Гүлшат Иманалиева ашып, бүгінде қоғамда 30 адам барын, бұл филиалдың өткізіп отырған ең алғашқы шарасы екенін тілге тиек етіп, барлық қатысушыларды Отан қорғаушылар, Жеңіс күндерімен құттықтап, жұмыстарына сәттілік тіледі.
«Көзіңмен көр!» әлеуметтік- зияткерлік сайысына төрт команда қатысты. Әр команда тобына ат қойып, тобын, ұранын таныстырды. Мүгедектер мен оқушылардан құралған «Жеңімпаз», «Жалынды жастар», «Жеңіс», «Ортақшыл» командалары өз тобын, ұранын таныстыруға көшті. Сайыстың екінші «Тыңда, ойлан, жауап бер!» бөлімінде әр топ жұмбақтар шешсе, үшінші «Сипап біл!» бөлімінде қалта ішінде жасырылған затты сыртынан ұстап көру арқылы ол қандай зат екенін табуы тиіс. Бұл тұста да командалар ұтқырлық танытты. Соңғы төртінші бөлім «Сөз ойынында» берілген әріптерден сөз құрастыра білді. Арасында көп сөз құрастырған командалар да болды. Қай команда да ұтқырлық танытып, жеңіске жетуге тырысты.
З.Ещанова атындағы балалар өнер мектебінің оқушылары сазды бағдарламаларын ұсынды. Саян Жақсылық «Күнге табыну» әнін шырқаса, Динаның күйін, «Ерке сылқым» күйлерін күмбірлеткені көпшіліктің көңілінен шықты. «Жаңбырлы ғұмыр» әні де жиналғандарға жылылық сыйлады.
Аудандық білім бөлімінің басшысы Венера Қабышева жиналғандарды мерекемен құттықтап, балалармен бірге сонау балалық шаққа саяхат жасағандарын айтып, үлкен-кіші демей, сайысқа атсалысқандарына ризашылығын білдірді. Ол мүмкіндігі шектеулі жандармен бірге сайысқа атсалысқан бір топ оқушыны алғыс хатпен марапаттады. Атап айтсақ, Асылым Әбдешқызы, Елнұр Шаймардан, Ерасыл Жұмабек, Ернұр Артемұлы, Каусар Ғалымжан, Гүлім Қайролла, Самал Талғатова, Гауһар Талғатова білім бөлімінің алғыс хатына ие болды.
«Қазақ соқырлар қоғамы» ҚБ филиалы өкілі Гүлшат Иманалиева шараны өткізуге атсалысқан білім бөлімі басшысы Венера Берікқызына, аудандық білім бөлімінің әдістемелік кабинет меңгерушісі Шынар Хамитоваға «Қазақ соқырлар қоғамы» АҚ атынан алғыс хат тапсырды. Осы шараны ұйымдастыруға атсалысып, демеушілік көмек қолын созған кәсіпкерлер «Первомайский» ЖШС директоры Б.Есқараев, «Берекет» мейрамханасының басшысы Р.Жұмағалиеваларға да ризашылығын білдіріп, барлық қоғам мүшелеріне сыйлықтарын ұсынды.
Аудандық З.Ещанова атындағы балалар өнер мектебінің директоры Эльмира Еспусинова «Жеңімпаз», «Жалынды жастар», «Жеңіс», «Ортақшыл» командаларын алғыс хатпен марапаттады.
Әділқазы мүшесі, аудандық орталық кітапхананың библио- графиялық-ақпараттық бөлімінің меңгерушісі Күнсая Суханғалиева сайысты қорытындылап, белсенді атсалысқан қоғам мүшелері Әлібек Сүлейменов, Мұрат Жайлашев, Сағынғали Қарабалиев, Батырбек Сатыбалдиев, Болатбек Есенов, Жанболат Құспанов, Данияр Бектілеуовке алғыс хат табыстады.
А.ТЕКЕБАЙ
