Аудан әкімі Қайрат Нұрлыбаевтың есеп беру кездесулері Ақтоғай ауылдық округінде жалғасты. Кездесу барысында округ аумағында атқарылып жатқан жұмыстар мен алдағы жоспарлар таныстырылды.
Әкімнің айтуынша, ауылдың 2,152 шақырым кірме жолын күрделі жөндеу жұмыстарының 95 пайызы орындалған. Сонымен бірге, 2,4 шақырым ауылішілік жолдарға жөндеу жүргізіліп, нысандар маусым айында қабылданған.
– Жасанды төсеніші бар ашық спорт алаңдарының құрылысы өндірістік кестеге сәйкес орындалмағандықтан, мердігер мекеме жосықсыз қатысушы тізіміне сот шешімімен енгізілді. Ө.Атамбаев және Бала Ораз елдімекендеріне ауыз су жеткізілді, ал Кеңөріс ауылына ауыз су желісін тарту жоспарлануда. Сонымен қатар, «Атырау- Ортақшыл-Махамбет-Ақтоғай» бағытында сынақ ретінде жолаушылар тасымалын қамтамасыз ететін автобус жолға шықпақ,- деді Қ.Нұрлыбаев.
Жыл соңына дейін ангар үлгісіндегі жылдам салынатын модульдік балалар спорт залының құрылысы аяқталуы күтілуде. Кездесу барысында алғашқы әскери дайындық пәні мұғалімі Ғибадат Каныкомов нысанның ішкі жабдықталуына қатысты ұсыныс айтты.
– Орындықтарын, жабдықтарын реттеп, ойыншыларға кедергі болмайтындай жағдай жасау қажеттігі туралы талабымыз бар. Спорт залға ағаш төсеніш салу жоспарланып отыр екен. Алайда қазіргі талаптарға сай мұндай төсеніштен гөрі паркет тиімді. Волейбол Ақтоғайда жақсы дамып келеді. Сондықтан зал тиісті жабдықтармен, оның ішінде допатқышпен қамтамасыз етілуін сұраймыз,-деді ол.
Мұғалім ұсынысын орынды деп бағалаған аудан әкімі:
– Таңдай ауылындағы спорт кешеніне 2 млрд. теңге жұмсалды. Ал бұл жылдам құрастырылатын спорт залының құны 4 млн. теңгеге жуық. Егер толық жабдықтауды қоссақ, шығын бірнеше есеге өседі. Қазіргі уақытта мұндай қаражатты бөлу мүмкін емес. Халық санына қарай әзірге шағын зал салынуда. Келешекте сұраныс өссе, заманауи спорт кешенін салу қарастырылады,-деді Қайрат Нұрлыбаев.
Кездесуден соң аудан әкімі тұрғындарды жеке мәселелері бойынша қабылдап, көтерілген өтініштерді тыңдап, тиісті бөлім басшыларына тапсырмалар жүктеді. Тұрғындардың мәселелері заң аясында шешілетіндігі атап өтілді.
Қ.БАҒЫТ
