Атырау облыстық Білім беру басқармасының Әдістемелік орталығының ұйымдастыруымен STEAM технологияларын оқу процесінде қолдану мақсатында пән мұғалімдері арасында «STEAM: Әдіс. Практика» тақырыбында облыстық байқауы бастау алған болатын.
Аталған байқаудың аудандық кезеңінде Steаm технологиясын оқу процесінде қолданатын 7 мектептің информатика және физика пәндерінің мұғалімдері қатысып, шеберлігін шыңдады. Әділқазылардың шешімімен облыстық байқауға Қызылүй орта мектебінің информатика пәні мұғалімі Нұрбол Хамзиннің «Жергілікті туризмді дамыту. Сарайшық» жобасы жіберілді.
Облыстық байқауда Steаm технологияларын оқу процесінде қолданатын, жан-жақты кәсіби дамыған, практикалық икемділігі мен дағдысы қалыптасқан үздік маманды анықтау барысында 7 педагог бақ сынады. Байқау екі кезеңнен тұрды. Бірінші кезеңде педагогтің әртүрлі әдістерді – STEM технологияларын оқу бағдарламасында айқындалған сабақтар көрсетілсе, екінші кезеңде өзекті тақырыптарға дайындалған креативті , нақты авторлық позициясы бар, инновациясы, құндылығы, шығармашылық тәсілі бар жобалар ұсынылды.
Аудан намысын қорғаған Нұрбол Хамзин облыстық байқаудан І орынды жеңіп алып, аудан мерейін асқақтатты.
Қазбек БАҒЫТ
