Балалардың шығармашылық қабілеттерін дамытып, ән-биге деген қызығушылықтарын ояту, сахнада өздерін еркін ұстауға дағдыландыру мақсатында «Нұршуақ» бөбекжай-бақшасында балабақшаішілік «Жарық жұлдыз» байқауы өтті.
Байқау көркемсөз оқу, вокал, хореография бойынша үш кезеңнен тұрды. Көркемсөз оқу кезеңін қазақ тілі маманы Гүлнәсіп Бимағамбетова ұйымдастырды. Балалар Абайдың, Мұқағали Мақатаевтың өлең-жыр шумақтарын мәнерлеп, нақышына келтіре оқыды. Бұл кезеңде І дәрежелі дипломмен «Құлыншақ» ересек тобының тәрбиеленушісі Әлібек Айзада, ІІ дәрежелі дипломмен «Қарлығаш» тобының тәрбиеленушілері Ардақ Жансель, Ерланқызы Ақгүл, ІІІ дәрежелі дипломмен Қыстаубай Ұлмерек, Атшыбай Алдияр, Атшыбай Мадияр марапатталды. «Алғыс хатқа» Алтынбекқызы Адина, Марат Жантөре, Қыстаубай Жансұлтан ие болды.
Вокал жанры бойынша музыкадан Назерке Камзина дәріс беретіндіктен балалар ана, Отан, балалық шақ туралы әндер шырқап, маңайды әсем сазға бөледі. Қорытындысында І дәрежелі дипломмен Бұланқызы Ясина, ІІ дәрежелі дипломмен Жақсылық Ислам және Каримова Медина, ІІІ дәрежелі дипломмен Марат Жантөре, Бағдат Әдемі, Кихаева София марапатталды.
Ал, байқаудың соңғы хореография кезеңіне жетекшілік еткен хореограф Гүлден Жұмағалиева. Балалар әртүрлі бағытта би билеп, жоғары деңгейде өнер көрсетіп шықты.
Балалардың өнерін тамашалаған балабақша әдіскері Шынар Каримова сөз сөйлеп, би жанры бойынша өнер көрсеткен «Қарлығаш» тобының тәрбиеленушілеріне І дәрежелі дипломды табыстады. Сонымен қатар ІІ дәрежелі дипломмен «Құлыншақ» т о бының тәрбиеленушілері «Теңізшілер» биімен, ІІІ дәрежелі диломмен «Гүлдер» ересек тобының тәрбиеленушілері, «Ягодка» тобының тәрбиеленушілері «Весна» биімен көзге түсіп, марапатталды.
А.БИТАНОВА,
«Нұршуақ» бөбекжай- бақшасының логопед маманы
