Аудандық ішкі саясат бөлімінің қолдауымен, «JARQYN BOLASHAQ» жастар қоғамдық бірлестігінің ұйымдастыруымен мектеп оқушылары арасында «Mahambet CUP-2024» дебат турнирі өтті.
Турнир барысында пікір сайысшы- лар «Мектептегі буллингтің алдын- алу – мұғалімдердің тікелей міндеті», «Ата-ана балалардың мамандық таңдауына араласпауы керек», «Ата- аналар балалардың эмоциялық қажеттіліктерін ескеру керек», «Мектептерде ЖИ-пен жұмыс істеу – дұрыс шешім» және «Мектептерде онлайн оқытуды тұрақты формат ретінде енгізу» секілді қарарларды талқылады.
Бірнеше сағатқа созылған пікірталас турнирінің қорытындысында Қызылүй орта мектебінің «Таразы» командасы жеңімпаз атанып, 100 000 теңгелік қаржылай сыйақыға ие болды.
Қ.Ахмедияров атындағы орта мектептің «Таңдайым» командасына екінші орын және 70 000 теңге бұйырды. Жалғансай орта мектебінің «Адырна» командасы үздік үштікті түйіндеп, 40 000 теңгені қанжығаға байлады. «Үздік спикер» атағымен «Таңдайым» командасының ойыншысы Назира Аралбай марапатталды. Өзге қатысушыларға Алғыс хат және қаржылай сертификаттар табысталды.
Турнир жоғары деңгейде өтіп, жас пікірсайысшылар өздерінің сыни ойлау мен шешендік қабілеттерін шыңдады.
Қ.БАҒЫТ
