Биыл Қазақстанның су басқан 10 облысында төтенше жағдай жарияланған еді. Елдегі су тасқынына көлемі жағынан «соңғы 80 жылдағы ең ірі табиғи апат» деп баға берілді. Азаматтық қорғаныс мемлекеттік жүйесінің қызметтері су тасқыны салдарын жою, су тасқынына қарсы іс-шараларды, апаттық-құтқару жұмыстарын тынымсыз жүргізді. Жалпы төтенше жағдайлар таралу аумағына және келтірілген нұқсанның көлеміне қарай объектілік, жергілікті, өңірлік және жаһандық болып бөлінеді.
ЖАҒА БЕКІТУ ЖҰМЫСТАРЫНА ЖҰМЫЛДЫ
Махамбет аудандық №11 ӨСБ- нің қылмыстар, оқиғалар туралы өтініштерді, хабарламаларды және өзге де ақпаратты есепке алу кітабына жалпы саны 65 хабарлама тіркелді. Оның ішінде, өрт оқиғасы – 11, өртке жатпайтын жанулар – 31, авариялық құтқару жұмыстары – 12, басқа да шығулар 11 рет тіркелсе, газға уланудың бір оқиғасы орын алды. Белгіленбеген орындарда суға кету оқиғасы тіркелген жоқ.
Автокөлік техникаларында екі, тұрғын үй секторында сегіз, басқа да орындарда бір мәрте өрт оқиғасы тіркеліп отыр. Электр тоғының қысқаша тұйықталуы салдарынан – 8, пеш құрылғыларында – бір, бөгде адамдардың отпен абайсыздығынан екі мәрте өрт оқиғасы орын алған.
– Аудан әкімінің төрағалығымен жыл басынан төтенше жағдайлардың алдын алу және жою жөніндегі комиссиясының жоспарлы және жоспардан тыс отырыстар өткізіледі. Облыс аумағында су басу қаупі туындауына байланысты облыс әкімінің 2024 жылғы 7 сәуірдегі қаулысымен төтенше жағдай жариялануына байланысты ауданның барлық елді мекенінде жаға бекіту жұмыстары жүргізілді. Бөгеттерді нығайту жұмыстарына төтенше жағдайлар кезінде 250 техника, 170 адам, 634 әскер, ТЖМ – 229 қызметкер, 29 техника, 21 қайық, ерікті, ауыл тұрғындарынан 90-ға жуық адам жұмылдырылды. Ауданға қарасты барлық елді мекендерде ерікті тұрғындар көмегімен 1 484 520-ға жуық қапшық қапталды,- дейді аудандық ТЖ бөлімі бастығының уақытша міндетін атқарушы Әйгерім Медетова.
Сонымен қатар, «Көктем-2024» және «Қыс-2024» оқу – жаттығуы өткізіліп, құзырлы орган мамандарының қатысуымен теориялық және практикалық іс- шаралар ұйымдастырылды. Өрт қауіпті маусымында дала және орман өрттерінің алдын алу бойынша Сарытоғай ауылында орман шаруашылығы қызметкерлерімен бірлескен түрде оқу-жаттығу өткізілді.
ЕРІКТІЛЕР ЖАСАҒЫ ҚҰРЫЛДЫ
Аудан әкімінің шешімімен 14 азаматтық қорғау қызметі құрылған. Олардың ТЖ алдын алуға немесе жоюға жұмылдырылатын мамандарымен күш-құрылымдарының дайындығы үнемі қызмет барысында тапсырмаларға сай, тексеріліп, арнайы техникалардың есептері нақтыланып тұрады. Жалпы аудан көлемінде тоғыз ауылдық округте құрылған 94 адамды қамтитын ерікті өрт сөндіру жасақтары бар. Аудан әкімі аппараты қызметкерлерімен бірлескен түрде арнайы орталық мамандарының қатысуымен аудандағы жалпы саны 80 еріктіні өрт қауіпсіздігі жағдайлары бойынша оқыту жұмыстары осыған дейін жүргізіліп, сертификаттар табысталған болатын.
Бейбарыс, Ақжайық, Алға, Сарайшық ауылдық округтерінде өрт сөндіру автокөліктері және Бақсай, Сарайшық, Есбол ауылдық округтерінде өрт сөндіру модульдері алынып, дала немесе орман өрттері, т.б болған жағдайда жауынгерлік жағдайға келтіріліп, дайын тұр. Қызмет барысында дайындықтарын қарау жұмыстары үнемі атқарылады. Қазіргі кезде тек Жалғансай, Ақтоғай ауылдық округтері қамтылмаған. Аудандық ТЖ бөлімі бастығының уақытша міндетін атқарушы Әйгерім Медетованың сөзінше, бұл бағытта жергілікті әкімдік мамандарымен бірлесіп, тиісті жұмыстар жүргізілуде.
– Аудандық жастар ресурстық орталығы жанынан құрылған еріктілер жасағының тізімі жасақталып, біздің бөліммен екіжақты меморандумға қол қойылды. Меморандум негізінде тұрғын үй секторында өрттің алдын алу, қысқы мезгілдегі мұздағы қауіпсіздік, жазғы өрт қауіпті кезең және суға шомылу маусымы бойынша бірлескен түрдегі рейдтік шаралар жүргізіліп, тұрғын үй араланып, жадынама бетшелері таратылды. Аудан аумағында құрылған «Жас құтқарушы» жасағы бойынша аудан аумағында 15 орта мектепте 120 баладан тұратын жасақ құрылған. Бөлім қызметкерлерімен лекциялар, нұсқаулар жүргізіліп, аудандық газет бетіне және әлеуметтік желілерге 32 материал шығарылып, 16 бейнеролик, брифинг ұйымдастырылды,- дейді Ә.Медетова.
ӨРТ ҚАУІПСІЗДІГІН САҚТАУ – МАҢЫЗДЫ
Қысқы мезгілде тұрғын үй секторында өрт болып тұратыны жасырын емес. Төтеншеліктердің сөзінше, негізгі себеп – пешпен жылытуды және электрмен жылыту аспаптарын пайдалану кезінде өрт қауіпсіздігі қағидаларын сақтамау. Өрт пен адам өліміне жол бермеу мақсатында аудандық төтенше жағдайлар және №11 өрт сөндіру бөлімінің қызметкерлері мен жергілікті атқарушы органдар бірлесіп, жылыту кезеңінде тұрғын үй секторында өрт қауіпсіздігі ережелерін сақтау бойынша рейдтік іс-шаралар өткізуде.
– Рейдтің негізгі мақсаты – тұрғындарды саналы болуға және өрт қауіпсіздігі ережелерін бұзуды болдырмауға шақыру. Аудандық төтенше жағдайлар бөлімінің қызметкерлері электр желілерін жүктеуге, электр құралдары мен газ жабдықтарын пайдалану кезінде өрт қауіпсіздігі ережелерін бұзуға жол берілмейтінін түсіндірді. Өрт шыққан немесе түтін шыққан жағдайда өрт сөндіру қызметіне нақты мекен-жайын көрсете отырып, «101» немесе «112» нөмірлері бойынша дереу хабарласу керек,- деді Ә.Медетова.
Сонымен қатар, тұрмыста қарапайым өрт қауіпсіздігі ережелерін сақтау жөнінде бөлім қызметкерлерімен түсінік жұмыстарын жүргізу барысында тұрғын үй секторы аралануда. Өрт қауіпсіздігі ережесін сақтау тақырыбында 8 жадынама мен брошюра дайындалып, 4850 дана таратылды. Жылу беру маусымы мерзімінде де тұрғындардың улы газге және табиғи газге улану оқиғаларының алдын алу мақсатында аудандық «QAZAQGAZ AIMAG» АҚ Махамбет газ шаруашылығы бөлімшесімен бірлескен түрде аудандағы тұрғын үйлерге үш мәрте рейд шаралар өткізіліп, халық арасында түсінік жұмыстары жүргізілді. Аудан көлемінде 20 дана түтіннен қорғау дабыл қаққыш датчигі орнатылды.
ОҚУ-ЖАТТЫҒУ ОЙДАҒЫДАЙ ӨТТІ
21-22 қараша күндері еліміздің барлық өңірінде «Азаматтық қорғаудың мемлекеттік жүйесінің басқару органдары мен күштерін қысқы кезеңдегі төтенше жағдайлардың алдын алу және оларды жою жөніндегі іс-қимылдарға дайындау» тақырыбында «Қыс-2024» командалық-штабтық оқу-жаттығуы өтті. Оқу-жаттығудың мақсаты – азаматтық қорғау мемлекеттік жүйесінің және халықтың қысқы кезең жағдайында төтенше жағдайларды жоюға дайындығы мен қабілеттілігін арттыру, азаматтық қорғау қызметтері мен құрылымдарының қысқы кезеңдегі ТЖ-ға ден қоюға дайындығын тексеру.
«Қыс-2024» республикалық командалық-штабтық оқу- жаттығуының бірінші кезеңі сағат 11:00-де басталды. «Дабыл-1001» сигналы бойынша азаматтық қорғаудың мемлекеттік жүйесінің басқару органдары мен күштері, төтенше жағдайлар бөлімі, полиция, өрт сөндіру, байланыс бөлімдері дайындыққа келтірілді. «Жастар саябағы» алдына мемлекеттік органдардан, республикалық оқу-жаттығу штабы мүшелерінен құрылған жедел топтар жиналып, оларға қойылған міндеттер жеткізілді. Аудан әкімінің орынбасары Асхат Аймұратов саптық дайындыққа келтірілген азаматтық қорғау жүйесінің құрал- жабдықтарымен, құжаттамаларымен танысып шықты.
Оқу-жаттығудың екінші кезеңінде басқару органдарына «Қарғын-2002» басқару сигналы, дауылды ескерту және оқу-жаттығу тақырыбына байланысты тиісті кіріспе жеткізілді. Қалыптасқан жағдайды бағалау және төтенше жағдайдың салдарын жоюға шешім қабылдау кезінде басқару органдарының іс-қимыл алгоритмі пысықталды.
Жалпы оқу-жаттығу жиынына 100-ге жуық қызметкер, 30 шақты техника жұмылдырылды. Жаттығу кезінде құтқарушылар, полиция департаменті, жедел жәрдем, коммуналдық қызметтің жұмысы тексерілді. Бұл дайындықтың көрсеткіші бет қаратпайтын аяз бен үскірік боранды күні көрінеді. Бір сөзбен айтқанда, қылышын сүйретіп қыс келгенде ғана сыналары белгілі.
Қ.АЙТҚАЛИЕВ
