Ұлыстың ұлы күні, 22-наурызды елмен бірге атап өткелі алаңға келген ардагерлеріміздің бірі Болған Масалимова. Ұзақ жылдар мектепке дейінгі білім беру саласында еңбек еткен зейнеткер Наурызға сай ұлттық нақышта киініп, ақжаулықты әжеге тән образда келді. Басына таққан кимешегі де ерекше көзге түсті.
Осы бір думанды той күні сән-салтанаты жарасып келген Болған Ғибатоллақызы да тұрғындарға ақ тілегін арнады.
- Халқымыздың төл мерекесі, қазақша жыл басы Әз-Наурызға аман жетуімізбен барша тұрғындарды құттықтаймын. Наурыз бәрімізге де деннің саулығын, жанның байлығын берсін. Кейінгі ұрпақ үлкендерден көрген-түйгенімен осылайша жалғасытырып әкетеріне сенеміз. Бүгін міне, бар жақсымызды киіп елмен бірге тойға қатысуға келдім. Барлығы жақсы өтіп жатыр. Халық бір жағынан демалып, бір жағынан сағынысып көрісуде. Қай күнде де көргеніміз осындай той болсын,-деді өз сөзінде зейнеткер.
Наурыз тойына ақ жаулығын тағып арнайы келген қарттарымыздың да қарасы көп. Бәрі де, алақан жайып бата бергенде еліміз тыныш, халқымыз аман болсын! Қой үстіне бозторғай жұмыртқалаған заман болсын, Қанбамыз астыққа, дастарқанымыз молшылыққа толсын! деген ізгі тілегін айтып жатыр.
А.САТАЕВА
