1999 жылы жоғары оқу орнын аяқтап, Е.Ағелеуов атындағы Махамбет орта мектебіне жұмысқа орналасқан кезімде марқұм Сансызбай ағаймен 2001 жылы мектеп оқушыларының аудандық спартакиадасында танысқанбыз. Шәкірттері облыстық додаларда топ жарып, чемпион, жүлдегер атанды.
Сансызбай Сыдықов мектеп спортынан бөлек ауданның ересектер арасындағы бұқаралық шараның басы- қасында атсалысып, тер төкті. Ол ескі мектептің жертөлеге ұқсас спорт залынан спорттың талай чемпиондары мен жүлдегерлерін дайындады. Күндізгі уақытта дене шынықтыру пәнінен сабақ берсе, жұмыстан кейін де бар уақытын шәкірттеріне арнап, олардың жаттығуына жағдай жасайтын. Спорт зал оның екінші үйіндей болды десек те артық айтқандығымыз емес. Сансызбай ұстазымыз волейбол спортынан бөлек, дойбы, шахмат, тоғызқұмалақ, жеңіл атлетика, футболдан да үздік шәкірттер тәрбиелеп шығарды. Соның ішінде ерекше айтатынымыз, волейболдан 5-6, 7-8, 9-11 сыныптар арасындағы мектеп оқушыларының облыстық лигаларында шағын ғана ауылдан шыққан оқушылардан құралған ұлдар мен қыздар командалары облыста талай мәрте чемпион атанып, облыстың намысын республикалық жарыстарда қорғады және жүлдегер атанды. Шәкірттерінің қайсыбір жарыстардан құралақан қайтқан күндері сирек кездесетін.
Білікті бапкер, өз ісінің нағыз майталманы, ауданның спорт саласының дамуына өлшеусіз үлес қосып, әр шәкіртінің жүрегінен орын алған ардақты ұстаз Сансызбайдай әріптес-ағамның еңбегін елі ешқашан ұмытпайтыны анық.
Асқар АЛЬДЕШОВ,
Махамбет балалар-жасөспірімдер спорт мектебі директорының оқу жөніндегі орынбасары
