Облыс әкімінің орынбасары Қайрат Нұртаев Махамбет ауданында өткен Атырау облысы аумақтық қорғаныс бригадасының әскери қызметшілерінің оқу-жаттығу жиынына қатысты. Әскери жиын «ҚазТранс Ойл» АҚ Атырау мұнай құбыры басқармасының «Карма­нова» мұнай жылыту стансасы маңында өтті.

Тактикалық эпизод бойынша «со­дырлардан» құралған екі топ Кар­манова мұнай жылыту станциясы маңына өрт қойып, шабуыл жа­сады. Дереу «төтенше жағдай» жа­рияланып, бақылау-өткізу бекеттері күзет роталарымен күшейтілді. Жүк көлігіндегі «содырлар» екі жақтан шабуыл жасады. «Зардап шеккен» әскери қызметкерлерге жедел жәрдем шақырылды. Көру мүмкіндігін азайту үшін жеке құрам ұрыс алаңында арнайы түтін гранаталарын пайдаланды. Осы сәтте полиция департаментінің жедел әрекет ету жасағы (СОБР) аумақтық қорғаныс бригадасының жеке құрамымен бірге «содыр­ларды» қоршауға алды. Қашып кет­пек болған көлікті полицияның ар­найы жасақтары тоқтатып, «содыр­лар» ұсталды.

Жиын соңында облыс әкімінің орынбасары тактикалық-арнайы оқу-жаттығулардың сәтті өтуі үшін белсенділік танытқан ла­уазымды тұлғалар мен әскери қызметкерлерді жоғары тәртіп пен қызметтік міндеттерін үлгілі орындағаны үшін Алғыс хатпен ма­рапаттады.

- Бейбіт заман аспанында күніміз атқанымен, әскери қызметкерлер кез келген оқыс оқиғаға дайын бо­луы керек. Бүгінгі оқу-жаттығу жиынының мақсаты да сол. Ел басына күн туса, бірінші кезек қатарында осындай әлеуметтік маңызы бар нысандардың күзеті күшеюі тиіс. Дәл бүгінгідей әскери форма киіп, тек оқу-жаттығуда кездесейік. Отанға деген адал қызметтеріңізге алғыс, - деді Қ.Нұртаев.

Шара барысында жедел медициналық жәрдем қызметкерлері мен өрт сөндірушілер де жедел әрекет етті.

Тактикалық - арнайы оқу - жаттығулар әскери борышын өтеуге міндеттілердің салтанатты маршы­мен аяқталды.

Бірнеше күнге созылған оқу- жаттығу барысында әскери қызметшілер Сарытоғай ауылындағы «Арай» лагерінің ба­засында орналасты.

Майра СЕЙІТҚАЛИҚЫЗЫ,

Махамбет ауданы