О.Шонаев атындағы орта мектеп базасында жастардың сыни ойлау қабілетін, шешендік өнерін және қоғамдық белсенділігін дамытуға бағытталған «Makhambet CUP» пікірсайыс турнирі ұйымдастырылды.
Аталған зияткерлік додаға мектеп оқушыларынан құралған командалар қатысып, өз ойларын еркін жеткізу, дәйекті аргумент ұсыну және қарсы пікірді теріске шығару бойынша бақ сынады. Турнир америкалық және парламенттік формат (АПФ) ережесіне сәйкес өтті.
Жарыс қорытындысы бойынша І орынды “Жалын” командасы жеңіп алса, ІІ орын «Руханият» командасына бұйырды. ІІІ орынды «Аргументаторлар» және “Бүркіт» командалары еншіледі.
Сонымен қатар турнирдің ең тартысты сәттерінде тапқырлығымен көзге түсіп, қарсыластарын логикалық дәлелдерімен және шешендік шеберлігімен басып озған үздік спикерлер аталымына Сүлейменова Айару мен Қуанышқали Дильназ ие болды.
Барлық жеңімпаздар бағалы сыйлықтармен, арнайы дипломдармен марапатталып, қатысушыларға сертификаттар табысталды.
Турнирдің негізгі мақсаты – жастар арасында пікірталас мәдениетін қалыптастыру, олардың сыни тұрғыдан ойлау қабілетін арттыру және өз ойын еркін жеткізуге баулу. Ұйымдастырушылардың айтуынша бұл бастама жасөспірімдер- дің көшбасшылық қасиеттерін шыңдауға, азаматтық ұстанымын ашық жеткізуге жол ашады.
А.САТАЕВА
