Елімізде мүмкіндігі шектеулі азаматтарға әлеуметтік көмек көрсетуден бөлек, оларды түрлі спорттық, мәдени іс-шараларға қатыстырып, қоғамдық ортаға бейімдеу, белсенділіктерін арттыру бағытында жүзеге асып жатқан жұмыстар аз емес. Соның бірі – жуырда аудандық балалар және жасөспірімдер спорт мектебінде өткен дойбы және тоғызқұмалақтан мүгедектер арасындағы спорттық жарысы.
Спорттық шараның ашылу салтанатына аудан әкімінің орынбасары Махамбет Ербөлек, аудандық мүгедектер қоғамының жетекшісі Жолай Түгелбаев, «Amanat» партиясы аудандық филиалының атқарушы хатшысы Руслан Әженов, мекеме және бөлім басшылары қатысты.
Аудандық мәдениет, тілдерді дамыту, дене шынықтыру және спорт бөлімі мен аудандық мүгедектер қоғамының ұйымдастыруымен өткі- зілген спорттық жарысқа Ақжайық, Есбол, Сарайшық, Бақсай және Махамбет ауылдарынан барлығы 25 спортшы қатысып, бақ сынады.
Жарыс қорытындысында дойбыдан ерлер арасында І орынды Р.Бимағанов, ІІ орынды Қ.Дюшев, ІІІ орынды Б.Сұлтанов иеленсе, ал әйелдер арасында І орынды Г.Шагирова, ІІ және ІІІ орындарды Ә.Габдуллина мен С.Верушкина өзара бөлісті.
Ал, тоғызқұмалақ сайысында ерлер арасынан М.Наурызбекұлы І орынмен, М.Қуангереев ІІ орынмен, Ж.Нұрғалиев ІІІ орынмен марапатталды. Осы спорт түрінен әйелдер арасында І орынға А.Жайсанбаева, І І орынға Н.Адайбаева, ІІІ орынға Г.Иманалиева ие болды. Жүлдегерлерге диплом мен ынталандыру сыйлықтары табысталды. Сонымен қатар, жарыс жеңімпаздары 3-ші наурызда өтетін облыстық жарысқа жолдама алды.
Ж.Түгелбаевтың айтуынша, ауданда 1341 мүгедек тіркелсе, оның ішінде 27- сі белсенді. Мүмкіндігі шектеулі жандар арасындағы осындай спорттық, мәдени іс-шаралар алдағы уақытта жалғасын табатын болады.
Б.САПАРОВА
