Тілдерді дамыту басқармасының ұйымдастыруымен өткізілген жас мемлекеттік қызметшілер арасындағы дәстүрлі «Тіл шебері -2018» облыстық байқауына ауданымыздан қатысқан Махамбет ауданы әкімі аппаратының маманы Саян Меденов қарсыластарын шаң қаптырып, «Бас жүлдені» қанжығаға байлады.
Байқаудың мақсаты — қазақ, орыс және ағылшын тілдерін жетік меңгерген жас мемлекеттік қызметшілерді анықтау және қолдау, тіл мәдениетін көтеру, үштілділікті насихаттау болды. Басты ұстаным — олардың үш тілді меңгеру деңгейі мен тілдік норманы сақтауы, орфографиялық және орфоэпиялық сауаттылықтарына көңіл аударылды. Соның ішінде мемлекеттік тілді жетік білуі қазылар алқасының назарында болды. Білім мен біліктілік бәйгесіне талабын ұштап, үмітін үкілеп келген 11 жас мемлекеттік қызметшілердің арасынан ойының ұшқырлығымен көрініп, білім- ділігі, тапқырлығы арқылы көзге түсіп, қарсыластарынан оқ бойы озық шыққан біздің Саян «Бас жүлдені» жеңіп алып, республикалық байқауға жолдама алды.
Баян СҮЛЕЙМЕНҚЫЗЫ.
