Махамбет аудандық Төтенше жағдайлар бөлімі аудандық полиция бөлімінің қызметкерлерімен бірлесіп, аудан орталығындағы автокөліктерді тоқтату арқылы рейдтік іс-шара ұйымдастырды.
Автокөліктердегі өрт оқиғаларының алдын алу мақсатында өткен рейд барысында автокөлік иелеріне өрт қауіпсіздігі ережелерін қатаң сақтау қажеттілігі түсіндіріліп, өрт сөндіргіштері тексерілді. Барлық көлік жүргізушілерге «Автокөліктердегі өрт қауіпсіздігі» тақырыбында жадынамалар таратылды. Рейд кезінде тоқтатылған кей автокөліктерде өрт сөндіргіштің жоқтығы анықталды. Көлік иелеріне ауызша ескерту жасалды.
Сонымен қатар рейдтік жұмыстар жеке тұрғын үй секторларында да жалғасты. Үгіт-насихат жұмысын жүргізушілер тұрғындарды түрлі төтенше жағдайлардан сақ болуға шақырды. Жеке тұрғын үй секторын аралап, тұрмыстық өрт қауіпсіздігі ережелері мен жылу маусымында орын алатын өрттер туралы ақпараттарды үлестірді.
- Бүгін ауданымызда полиция бөлімімен бірлесе отырып тұрғын мен автокөліктегі өрт қауіпсіздігінің алдын алу бағытында түсінік жұмыстары жүруде. Үгіт-насихаттың басты мақсаты – өрт қауіпсіздігі талаптарының алдын алу. Ережелер түсіндіріліп, тұрғындарға жадынамалар таратылып жатыр. Көбінесе өрт оқиғалары электр желілерінің қысқа тұйықталуынан орын алуда. Жылыту беру маусымында аудан тұрғындарын өрт қауіпсіздігі ережелерін сақтауға шақырамыз,- деді аудандық төтенше жағдайлар бөлімінің аға инженері, азаматтық қорғау майоры Рүстем Жақсылықұлы.
Айта кету керек, жыл басынан бері Махамбет ауданында 3 өрт оқиғасы тіркелді. Оның екеуі тұрғын үй секторында орын алса, бір көлік өртке оранды. Жүргізушілер автокөлікті дер кезінде техникалық бақылаудан өткізіп тұруды естен шығармағаны жөн. Бұл – өрт қауіпсіздігінің алдын алудың басты шарасы.
Қ.АЙТҚАЛИЕВ
Суреттер автордікі
