Дәрі-дәрмектің бағасын қадағалау мақсатында бірнеше бақылаушы органдардан құралған мобилдік топ құрылған болатын.

Елдегі қалыптасқан жағдайда дәрілік заттарға бағаны әдейі көтеру, сондай-ақ жасанды тапшылықтың пайда болуы байқала бастаған еді. Осыған орай, ауданымызда дәріханалардағы дәрі-дәрмектің бағасын шарықтатпауды қадағалау мақсатында бірнеше бақылаушы органдардан құралған мобилдік топ құрылған болатын.

Құрамында «Атамекен» ҰКП аудандық филиалы, «Атырау-адалдық алаңы» жобалық кеңсесі, кәсіпкерлік және туризм бөлімі мен «Nur Otan» партиясының аудандық филиалының өкілдері бар мобилдік топ аудан орталығындағы дәріханалардағы дәрі-дәрмек қорының жеткіліктігі, дәрілердің министрлік тарапынан бекіткен шектік бағадан асырмау жөнінде тексеріс жұмыстарын жүргізді. Рейдтік іс-шара барысында дәріханаларда бағаның әдейі көтеру фактісі анықталмады. Соған қарамастан, дәріхана сатушыларына дәріні шектік бағадан асырмау жөнінде ескертілді.

Айта кетейік, халықпен кері байланыс орнату үшін «Атырау-адалдық алаңы» жобалық кеңсесі жұмыс істейді. 8 775 166 5997 WhatsApp нөміріне азаматтар аудан дәріханаларындағы дәрі-дәрмектің бағасын көтеру фактілері бойынша фото және бейне материалдарды жібере алады. Азаматтардың жолдаған әрбір фактісі тексеріліп, бұзушылық анықталған жағдайда тиісті шаралар қабылданатын болады.

Қ.АЙТҚАЛИЕВ