Махамбет ауданында білім беру саласының үздігі, ауыл спортының жанашыры Марат Әменовті еске алуға арналған 2006-2007 жылғы жасөспірім қыздар арасындағы волейболдан республикалық турнир басталды. Бесінші жыл қатарынан өткізілген турнирде Ақтөбе, Атырау, Батыс Қазақстан облыстарынан барлығы 17 команда өзара бақ сынаспақ.

 Турнирдің ашылу салтанаты Марат Қалабайұлын бір минуттық үнсіздікпен еске алудан басталды. Махамбет аудандық ішкі саясат, мәдениет және тілдерді дамыту бөлімінің басшысы Асылжан Қайырғалиев, аудандық балалар және жасөспірімдер спорт мектебінің директоры Абат Қабенов және аудандық Қоғамдық кеңестің төрағасы Самат Жайлашев сөз алып, жарысқа қатысушыларға сәттілік тіледі.

- Марат Әменов мектеп жанындағы интернат мекемесінде тәрбиешілік қызмет атқарды. Оның көптеген шәкірттері аудандық, облыстық пәндік олимпиадалардың жеңімпаздары атанды. Шығармашылық бағыттағы өз елінің патриоты ретіндегі жұмыстары бір төбе. Әуесқой спортшы ретінде ауыл жастары мен мектеп оқушыларын спортқа баулу арқылы жас ұрпақтың бойына достық пен татулықты, жауапкершілікті, тәртіпті сіңірді. Ұрпақтарының мақтанышы болған Марат Қалабайұлын біз мәңгілік есте сақтаймыз,- деді туыстары атынан сөз алған С.Жайлашев.

Айта кетейік, республикалық турнир бес күнге жалғасады.

                         Жайық-Ақпарат