Қазіргі қоғамда тәуелділіктің түрлері көбейіп келеді, соның ішінде ең қауіптілерінің бірі – лудомания. Лудомания – адамның құмар ойындарға шектен тыс әуестеніп, өзін-өзі бақылай алмауы. Бұл тек бір адамның ғана емес, тұтас отбасының, тіпті қоғамның мәселесіне айналуы мүмкін. Сондықтан лудоманияға немқұрайлы қарауға болмайды.
Лудоманияның басты себептеріне жеңіл жолмен ақша табуға ұмтылу, психологиялық әлсіздік, күйзеліс пен жалғыздық жатады. Құмар ойындар бастапқыда көңіл көтеру ретінде көрінгенімен, уақыт өте келе адамды толықтай өзіне тәуелді етеді. Лудоман адам ақшасын, уақытын, тіпті жақындарын да ұмытып, тек ойынға беріліп кетеді. Нәтижесінде қаржылық қиындықтар, отбасылық жанжалдар, жұмысынан немесе оқуынан айырылу сияқты ауыр салдарлар туындайды. Ең қауіптісі – бұл тәуелділік адамның психикалық және рухани жағдайына кері әсер етеді.
Лудомания – адам өмірін іштен бұзатын қауіпті дерт. Онымен күресу үшін ең алдымен саналы көзқарас, өзін-өзі бақылау және жақындардың қолдауы қажет. Сонымен қатар қоғамда құмар ойындардың зияны туралы түсіндіру жұмыстарын күшейту маңызды. Әр адам өз болашағы мен денсаулығын ойлап, құмар ойындардан аулақ болуы керек. Тек сонда ғана біз салауатты әрі жауапты қоғам құра аламыз.
Г.СӘДУАҚАС
