Ұлы Абай «Адам ел құрметіне тек қана адал еңбекпен ғана бөленеді» — десе, осы тұста жеке кәсіпкер «Батима» шағын маркетінің иесі Ардақ Әділбекқызы Есбол ауылдық округінің 20 тұрғынын аудандық «Жайық шұғыласы» газетіне тегін жаздыртып берді.
Енді есболдықтар аудандық басылымнан жаңалықтарды оқып, атқарылып жатқан жұмыстармен таныса алады. Жалпы, Есбол жұртшылығы Ардақтың жомарттығына, мәрттігіне қанық екені белгілі. Өйткені ол талайға шапағаты тиген азаматша.
– Есбол өңірінің дамуына қолымыздан келгенше өз үлесімізді қосып келеміз. Кәсіпкерлік саласында еңбек етіп, тапқан-таянғанымызды көпшілікпен бөлісудеміз. Әрине, бұл – біздің парызымыз. Лайым, елімізде мұқтаж отбасылардың саны азайып, халықтың әлеуметтік жағдайы арта берсін – дейді Ардақ Әділбекқызы.
Қайырымдылық пен адамгершілікті биік ұстап, ту еткен, тағдыр тәлкегіне ұшыраған жаны жаралы жандарға жылы сөзі мен нақты ісімен көмек беріп жүрген жүрегінде иманы бар мейірімді жанға аудандық басылымға қолдау көрсеткені үшін алғысымыз шексіз.
