Аудан әкімінің орынбасары А.Аймұратовтың төрағалығымен үкіметтік емес ұйым өкілдерімен кездесу өтті. Облыстық Әділет департаменті және аудандық бөлім басшылары, аудандағы үкіметтік емес ұйым өкілдері қатысқан жиынның күн тәртібіне екі мәселе қойылды.
Алғашқы боп аудандағы белсенді үкіметтік емес ұйымдардың 2024 жылғы атқарған жұмыстары және 2025 жылға арналған жоспарлары жөнінде аудандық Ішкі саясат бөлімінің басшысы Н.Аруев баяндады.
- Қазіргі таңда ауданда 14 үкіметтік емес ұйым тіркелген. Оның ішінде 8 қоғамдық бірлестік, 6 қоғамдық қор болса, оның 3-еуі жұмысын жүйелі түрде жүргізіп отыр. Өткен жылы мемлекеттік әлеуметтік тапсырыстың әлеуметтік жобаларына сомасы 4400,0 мың теңге қаржы бөлінді. Атап айтсақ, «Спорт та бізге бағынышты» шарасына – 800 мың теңге. Жеңімпаз «Ержүректілер» ҚБ аталған қаржы есебінен спорттың 4 түрінен облыстық турнир ұйымдастырды. Оған 6 аудан мен Атырау қаласынан 70 мүмкіндігі шектеулі жан қатысып, жеңімпаздар бағалы сыйлықтармен марапатталды.
Сол секілді «Отбасым – мерейлі мекенім» шарасына 800 мың теңге бөлініп, оны «JARQYN BOLASHAQ» жастар қоғамдық бірлестігі ұйымдастырды. Республика күні қарсаңында өткен мерекелік шарада отбасылық құндылықтарды насихаттап жүрген аудандағы үлгілі, өнегелі отбасыларға Алғыс хат және сыйлықтар табысталды. Бұдан бөлек, аталған қоғамдық бірлестіктің ұйымдастыруымен «Сарайшық: тарихқа тұнған туған өлке» атты облыстық суретшілер байқауы, сыбайлас жемқорлықтың алдын алу бағытында волейболдан турнир, «Ашық алаң» ересектер арасында дебат, «Әділ қоғам – жарқын болашақ» атты инстаграмм желісі арқылы әуесқой суретшілер арасында сурет байқауы да өткен болатын. Сонымен қатар мектеп оқушылары арасында “Makhambet CAP-2024” пікірталас турниріне 800 мың теңге бөлініп, шараны жоғары деңгейде өткізді.
Биылғы жылы аудан бойынша 2025 жылға жоспарланған мемлекеттік әлеуметтік тапсырыстың әлеуметтік жобалары және жалпы сомасы 27600,0 млн. теңге қаржы бөлініп, арнайы жоспар жасақталды, - деді бөлім басшысы Н.Аруев.
Үкіметтік емес ұйымдарға қойылатын талапқа сәйкес, атқарған жұмыстары туралы жылдық есептерін esep. govtec.kz сайтына тапсырып отыруы тиіс. Осы орайда, «деректер базасына 2024 жылғы қорытынды бойынша есеп тапсыру» және ҮЕҰ жұмысын ұйымдастырудағы өзекті мәселелер төңірегінде облыстық Ішкі саясат басқармасы «Азаматтық орталығы» КММ маманы Нұрай Сүйеуқызы айтып берді.
- Өткен жылдың қорытындысы бойынша атқарған жұмыстары туралы жылдық есептерін 9 үкіметтік емес ұйым тапсырды. 3 ҮЕҰ иесі дүниеден озып, қазіргі таңда жұмысы қозғалыссыз тұр. Сондай-ақ 2 ҮЕҰ иелерімен байланысу мүмкін болмай отыр. Жұмыс жасамайтын 1 ҮЕҰ өткен жылы жабылып, жаңадан біреуі тіркелу үстінде. Қазіргі таңда ауданда белсенді жұмыс жасап отырған 3 бірлестік қана. Жылдық есептерін уақытылы тапсырмайтын ҮЕҰ біздің жұмысымызға кедергі келтіреді. Сондықтан әрі қарай жұмыстарыңызды жалғастырмайтын болсаңыздар, ҮЕҰ жабуларыңызды сұраймыз.
Осы күнге дейін «Азаматтық орталықтың» ықпалымен ауданға бірнеше миллион қаржы тартылған болатын. Алдағы ҮЕҰ-дың санын арттыру, облыстық, республикалық гранттарға қатысуға ықпал ету мақсатында жүйелі жұмыстарды қолға алмақпыз, - деді өз сөзінде Н.Сүйеуқызы.
Ауданымыздағы белсенді «Ақжол» және «Ержүректілер», «Ауған соғысы ардагерлері» қоғамдық бірлестіктерінің өкілдері өздерін толғандырған инватакси қызметі, деректер базасына есеп тапсыру бойынша қойған сауалдарына жауап алып, аудандағы белсенді ҮЕҰ өкілдеріне жұмыс жасайтын кабинеттер берілсе, әлеуметтік тапсырыс бойынша бөлінетін қаржы көлемін арттырса деген ұсыныстарын жолдады.
Жиын соңында аудан әкімінің орынбасары А.Аймұратов ішкі саясат бөліміне мемлекеттік әлеуметтік тапсырыс шеңберінде үкіметтік емес ұйымдардың жұмысын жандандыруды, барлық бөлімдерге мемлекеттік әлеуметтік тапсырыс шеңберінде жоспарды мерзімінде сапалы орындауды, «Азаматтық орталық» маманына ҮЕҰ-мен тығыз байланыс жасап, жұмыстарын үнемі бақылауда ұстап отыруды тапсырды.
Б.САПАРОВА
