Наурыз мерекесі қарсаңында №2 мектеп-интернат ауласына ақшаңқан киіз үй тігіліп, «Қош келдің, әз Наурыз!» атты мерекелік шарасы өтті.
Шараны мектеп-интернат директоры Үміт Қабазова ашып, барша жиналғандарды, балалар мен ата- аналарды Наурыз мейрамымен құттықтады. Ақ кимешекті аналарымыз шашу шашып, биші қыздар «Шашу» биін дөңгелене биледі.
Облыстық білім беру басқармасының бас маманы Қадыржан Сапаров және білім беру басқармасының әдістемелік орталығының инклюзивті және арнайы бөлім басшысы Гүлжанар Кубиева жиналғандарды мерекемен құттықтап, қашанда жоғары жетістікке жетуге тілектестік білдірді.
Одан әрі шара мектеп оқушыларының концерттік бағдарламасына ұласты. Артур Балашов «Наурыз-көктем» әнін шырқаса, Асуланқызы Амина мен Амиралар «Қазақ» биін дөңгелене билеп, көрерменнің ыстық ықыласына бөленді. Гүлім Сергей «Құттықтаймын мама!» әнін тамылжыта орындағанда қол соқпаған жан қалмады. Егіздер Абдрахим, Абдрахман Қанатұлдары «Ана» әнін шырқауымен есте қалды. Сонымен қатар Нұрасыл мен Бекасыл «Гүл-көктем» әнімен жұртшылықтың көңілінен шықты. Мерекелік шара мұнан әрі спортзалдағы ұлттық ойындарға жалғасты. Бұл жерде балалар арқан тартыс, қазақша күрес, бес тастан сынға түсті. Арқан тартысқа ата-аналар да белсене қатысты.
Жиналғандар киіз үйдегі ұлттық тағамдар наурыз көже мен бауырсақтан дәм татып, ақ тілектерін жолдады. Ата-ана Тимур Дюсенгалиев өзінің Құлсарыдан келіп отырғанын, ұлы Абдуррахимнің осы мектепте оқитынын, мектепке көңілі толатынын, мұнда білім алам деген балаға бар жағдай туғызылғанын, үнемі ұлы ұстаздарын аузынан тастамайтынын, баласының биге икемі барын біліп, өнерге бейімдеп жатқан ұстаздарына алғысын жаудырды. Сол сияқты өзге де ата-аналар сөз алып, мектеп-интернат ұжымына алғыстарын жаудырды.
А.ТЕКЕБАЙ
