Қасиетті құрбан айт мерекесінің екінші күні Ақтоғай ауылында жаңа мешіттің іргетасы қалануына орай, құрбан шалынып, Құран оқылды.
Жоспарға сәйкес 150 адамды қамтитын мешіт құрылысы жыл аяғында аяқталып, пайдалануға беріледі деп күтілуде. Сонымен қатар, мешіт жанынан имам үйі мен таһаратхана салу да жоспарланып отыр. Аталмыш шараға Атырау облысының Бас имамы Алтынбек Ұтысханұлы арнайы келіп қатысып, мешіт құрылысының сәтті аяқталуын тілеп, ел амандығы үшін дұға жасады.
- Мешіт – тәрбиенің, руханияттың қайнар көзі. Азаны бар ауыл азбайды. Іргетасы қаланып жатқан мешітіміз ұлдарымыздың иманды, қыздарымыздың ибалы болып өсуіне ықпал етеді деп сенемін. Біздің мақсатымыз – батагөй қарттарымызды мешіт жанына топтастырып, дініміз бен дәстүрімізді, тарихымызды насихаттау арқылы, ұрпақ тәрбиесі, қоғам тұрақтылығына үлес қосу”, - деді Атырау облысының Бас имамы А.Ұтысханұлы.
Б.САПАРОВА
