Қазақстан Республикасы Парламенті Сенатының депутаты Сағындық Лұқпанов іссапармен Махамбет ауданында болды.
Ақжайық ауылында бой көтеріп жатқан «Жұмағалиева Н» шаруа қожалығының жылы- жай құрылысымен танысып, жұмыстарына сәттілік тіледі.Түрік технологиясымен салынып жатқан жылыжайдың жалпы аумағы – 22 гектар. Оның 4 гектары осы жылдың IV тоқсанында пайдалануға беріледі. Қазіргі таңда қаңқасы құрылып, электр және газ желісі тартылған нысанда жергілікті тұрғындарды жұмыспен қамтитын болады.
Көкөніс өнімдерін өндіруді мақсат еткен, жалпы құны 1,4 млрд теңге құрайтын жоба келешекте жылына 350 тонна қияр, қызанақ өнімін алмақ ниетте. Кейін сенатор Махамбет ауданының орталығында салынып жатқан 160 орындық спорт кешенінің құрылысымен де танысты.
350 миллионға жуық қаржы бөлінген бұл нысанның құрылысын негізінен мердігер компания өз қаржысына жүргізіп келеді. Оған өткен жылы Мақтааралға материалдық көмек ретінде бюджет қаржысының біраз бөлігі жолдануы да себеп болған. 2019 жылы жылы басталып, өткен жылғы пандемияның кесірінен құрылысы тұралап қалған нысан биылғы жылы аяқталады деп күтілуде.
Қ.АЙТҚАЛИЕВ
Сурет автордікі
