Қазақстан Республикасы Тәуелсіздігінің 30 жылдығына орай ардагерлер арасында үстел теннисі, дойбы, шахмат, тоғызқұмалақтан аудандық жарыс өтті.
Аталған жарыстың ашылу салтанатында ардагерлер кеңесінің төрағасы Е.Сабиров, Махамбет ауданының Құрметті азаматы, самбо күресінен КСРО спорт шебері Ж.Сұлтанов, аудандық мәдениет, тілдерді дамыту, дене шынықтыру және спорт бөлімінің басшысы Н.Латифұлы сөз сөйлеп, қатысушыларға сәттілік тіледі.
Жарыс қорытындысында үстел теннисінен І орынды Ермек Сабиров иеленсе, Алға ауылынан келген Қабен Смағұл мен махамбеттік Нұрпейіс Мұхиденов екінші, үшінші орындарға жайғасты.
Тоғызқұмалақтан бірінші орынды Алтын Қалишанова жеңіп алса, шахматтан Жылқайдар Сұлтановқа тең келер ешкім болмады.
Дойбыдан бірінші орынды таңдайлық Алданбай Қалмағанбетов, екінші орынды Гүлбану Бейсембайқызы, үшінші орынды Марат Сүйінішқалиев жеңіп алды. Жарыс жеңімпаздары мен жүлдегерлері аудандық мәдениет, тілдерді дамыту, дене шынықтыру және спорт бөлімінің диплом, бағалы сыйлықтарымен марапатталды.
Қ.АЙТҚАЛИЕВ