Салауатты өмір салтын ұстануға деген ынта-ниет спорттан басталады. Сондықтан нашақорлық әрекеттен сақтанудың бір жолы – жастардың бос уақытын жаттығулар мен білім алуға жұмсау. Осыған орай жастардың жаман жолға түсуінің алдын алу және салауатты өмір салтын насихаттау мақсатында волейбол спортынан жарыс ұйымдастырылды.
Ақтөбе облысы, Хромтау қаласында «Нашақорлыққа және есірткі бизнесіне қарсы күрес» кешенді жоспар негізінде ұйымдастырылған жарыс 2009-2010 жылы туған қыздар арасында өтті. Хромтау балалар-жасөспірімдер спорт мектебінің ашық біріншілігі ретінде өткен жарысқа Махамбет аудандық балалар және жасөспірімдер спорт мектебінің «волейбол» бөлімінің тәрбиеленушілері де қатысты.
Тренер Дәурен Аменовтың қол астында жаттығатын қыздар жүлделі ІІІ орын иеленді. Е.Ағелеуов орта мектебінің 6-сынып оқушысы Амина Ринатқызы «Үздік тосқауылшы» атағын иеленсе, Қосарал орта мектебінің 7-сынып оқушысы Әсел Бауыржанқызы «Үздік ойын ұйымдастырушы» атағына ие болды. Жарысқа қатысуға тәрбиеленушілердің ата-аналары қолдау білдірді.
Қ.АЙТҚАЛИЕВ
