Мектеп қабырғасындағы барлық оқушы меңгере алатын және жас талғамайтын зиялы спорт түрінің бірі – волейбол. Бүгінде қоян-қолтық ұрыссыз өтетін ерекше спорт түрімен айналысушылардың қатары көп. Жас волейболшылардың шеберлігі жоғары деңгейде өтетін жарыстарда айқындалады. Сондай жарыстың бірінде Қ.Қалыбеков орта мектебінің оқушылары һәм Махамбет аудандық балалар және жасөспірімдер спорт мектебінің волейбол бөлімінің тәрбиеленушілері жүлдегер атанды.
Жарыстың мақсаты – волейбол ойынын дамытып, жетілдіру, жас спортшылардың шеберліктерін шыңдау, олардың арасындағы өзара достық қатынасты нығайту және Қазақстан Республикасының чемпионатына қатысатын команда құрамына жасөспірімдерді іріктеу.
2011-2012 жылы туған жасөспірім ұлдар арасындағы ҚР Чемпионатына іріктеу ойындарында сарытоғайлықтар ІІ орынға ие болып, көптен күткен нәтижеге қол жеткізді. Оларды турнирге дайындап апарған команда жетекшісі – Елдос Бағдалов. Ептілік пен жылдамдықты талап ететін ойында жұлдыздары жарқыраған жас волейболшыларымызға жеңісті жолдарыңыз жалғаса берсін деген тілектеміз.
