Атыраулық 13 жасар шахматшы қызымыз Зарина Нұрғалиева Румыния елінде 14 жас аралығындағы ойыншылар арасында өткен Әлем чемпионатында жеңіске жеті.

Зарина 72 елден жиналған 96 шахматшы бақ сынаған "классика" бөлімінде алтын жүлдеге ие болды. АҚШ, Канада және Ресей елінің өкілдерімен тең ойнаса, Үндістан, АҚШ, Польша, Украина, Әзірбайжан, Латвия және Ресей елінің шахматшыларын жеңіп, 11 кезеңде 9 ұпай жинады.

Осы арқылы қаршадай қызымыз көк туымыздың көкке көтеріліп, әнұранымыздың аспанда әуелеуіне себепші болды. Саңлағымызды бұл сынға белгілі жаттықтырушылар Жәнібек Аманов және Сабырбай Гайсин дайындады.  

Айта кету керек, Зарина 2019 жылы Беларусия елінде 12 жасқа дейінгілер арасында алтын жүлдеге ие болып, жергілікті спорт тарихында болмаған табысқа кенеліп, шахматтан өңірімізден шыққан тұңғыш Әлем чемпионы атанған болатын.