Атырау қаласындағы №44 мектеп-гимназиясында «Отанды қорғау – бізден басталады!» тақырыбында «Жас сарбаз» балалар-жасөспірімдер әскери-патриоттық сыныбының ант қабылдау рәсімі өтті.
Бұл игі бастама жас ұрпақты отансүйгіштікке баулып, олардың бойында ел мен жерге деген құрметті қалыптастыруға бағытталған. «Жас сарбаз» мектебі – еліміздің болашағы үшін маңызды жоба. Ол жас ұрпақты әскери-патриоттық тәрбиемен сусындатып, Отан қорғау жолында қажетті білім мен дағдыларды меңгеруге мүмкіндік береді. Әскери өмірдің қыр-сырын үйрену, тәртіп пен жауапкершілікті сезіну арқылы оқушылар ел қорғаудың маңыздылығын терең түсінеді. Ант қабылдау рәсімінде жас сарбаздар Отан алдындағы парыздарын адал атқаруға серт беріп, патриоттық рухтарын көрсетті. Бұл іс-шараның мәні – жас буынның бойында елжандылық сезімін күшейтіп, олардың мемлекеттің болашағы үшін жауапкершілік алуына ықпал ету.
Жас сарбаздар үшін Отанды қорғау ұғымы тек бүгінгі күннің мәселесі емес. Бұл – тарихпен ұштасқан қасиетті міндет. Ұлы Отан соғысында жауға қарсы тұрған батыр бабаларымыздың ерлігі – жас буын үшін өнеге. Сол себепті бүгінгі ұрпақ олардың есімін ұмытпай, Жеңісті жақындатқан қайсар рухты батырлардың мұрасын ұлықтауы қажет. Бұл тұрғыда білім ордаларында тарихи-патриоттық іс-шаралар ұдайы ұйымдастырылып, белгілі тұлғалармен кездесулер өткізіліп тұруы тиіс. Өйткені өткенді білмей, келешекке нық қадам басу мүмкін емес. Біздің мектепте осы мақсатта ұйымдастырылған «Жас сарбаз» мектебінің ант қабылдау рәсіміне Қазақстан Республикасы Ұлттық ұланы «Батыс» өңірлік қолбасшылығының 5546 әскери бөлімінің командирі, полковник Ерлан Ипатов пен Атырау қаласының қорғаныс істері жөніндегі біріктірілген басқарманың бастығы, подполковник Құрманәлі Жүнісбеков қатысып, жас сарбаздарға ел патриоты болу жолында жан-жақты пікірлерін ортаға салды.
Абай АҚМҰРЗИЕВ,
№44 мектеп-гимназиясының директоры
