1,2 миллион микро және шағын бизнес субъектісі үш жыл ішінде 380 миллиард теңгеден аса ақша үнемдейді.
Осы жылдың 1 қаңтарынан бастап 2023 жылдың 1 қаңтарына дейін микро және шағын бизнес субъектілері табыс салығынан босатылды, деп хабарлайды ұлттық экономика министрлігінің баспасөз қызметі.
"Заңнамаға сәйкес микро бизнес – 15 адамға дейін жұмысшысы бар және жылдық табысы 30 мың АЕК (79 миллион теңге) дейінгі жеке кәсіпкерлер, ал шағын бизнес – 100 адамға дейін жұмысшысы бар және жылдық табысы 300 мың АЕК-ке (795 миллион теңге) дейінгі жеке кәсіпкерлер мен заңды тұлғалар", - деп түсіндірді министрлік.
Табысқа салынатын салыққа не жатады?
заңды тұлғалар үшін – корпоративтік табыс салығы;
жеке кәсіпкерлер үшін – жеке табыс салығы;
шаруа немесе фермер қожалықтары үшін – бірыңғай жер салығы; оңайлатылған декларация негізінде арнайы салық режимін жүзеге асыратын кәсіпкерлер үшін – әлеуметтік салық. "Қалған салықтар мен төлемдер міндеттеме туындаған кезде төленеді", - делінген хабарламада.
Министрлік арнайы салық режимін қолданатын микро және шағын кәсіпкерлік субъектілері салықтан босатылатынын еске салды. Олардың саны – 1,2 миллион. Нәтижесінде бизнес үш жыл ішінде 380 миллиард теңгеден аса ақша үнемдеп, қаражатты өз қызметін дамытуға жұмсай алады.
Кімдер салықтан босатылмайды
есірткі, психотроптық заттар мен прекурсорлардың айналымымен байланысты қызметті жүзеге асыратындар; акцизделетін өнім өндіру және (немесе) көтерме саудада сату;
астық қабылдау пунктерінде астықты сақтау бойынша қызмет; лотерея өткізу;
ойын бизнесі саласындағы қызмет;
радиоактивті материалдар айналымына байланысты қызмет;
банк қызметі (не банк операцияларының жекелеген түрлері) және сақтандыру нарығындағы қызмет (сақтандыру агентінің қызметінен басқа);
аудиторлық қызмет; бағалы қағаздар нарығындағы кәсіби қызмет;
кредиттік бюролар қызметі; күзет қызметі;
азаматтық және қызметтік қару мен оның патрондарының айналымымен байланысты қызмет;
жер қойнауын пайдалану саласындағы қызмет, оның ішінде алтын іздеушілер қызметі;
пайдалы қазбаларды сату, оның ішінде трейдерлер қызметі, көмір, мұнай сату бойынша қызмет;
бензин, дизель отыны мен мазуттың, мұнай өнімдерінің жекелеген түрлерін бөлшек саудада сату;
сыртқы экономикалық қызмет.
Өткен жылдың соңында мемлекет басшысы микро және шағын бизнесті табыс салығынан үш жылға босатуды көздейтін заңға қол қойған еді.
Дереккөз:Sputniknews.kz
