Ресей астанасының "Дом журналиста" ғимаратында қазақтың даңқты жазушысы, драматург Рахымжан Отарбаевтың орыс тіліне аударылған екі кітабының презентациясы өтті, - деп хабарлайды Tengrinews.kz тілшісі.
"Шыңғыс-ханның көз жасы" және "Бас" атты романдары "Художественная литература" баспасының бас редакторы Владимир Пряхиннің аудармасымен орыс тілінде жарық көрді. Бұл шараға мәскеулік жазушылар, тілшілер мен қатар Қазақстанның Ресейдегі елшілігінің өкілдері және жазушының ұлы Ермерей Отарбаев қатысты.
Владимир Пряхин жиналған қауымға бұл жобаны Қазақстан Республикасының Ресей Федерациясының елшілігінің қолдауымен іске асырғанын жеткізіп, алғысын білдірді.
Айта кетелік, Отарбаевтың шығармалары тек қазақ және орыс тілінде ғана емес, сонымен қатар француз, қытай, араб, түрік, қырғыз және ағылшын тілдеріне аударылды. Өз кезегінде, алғы сөз алған Қазақстанның Ресейдегі елшілігінің кеңесші-уәкілі Жанар Колбачаева "біз екі бөлек, тәуелсіз мемлекетте тұрғанымызбен екі ел арасындағы рухани байланыс нық, әрі бұзылмастай" деді. "Бір-біріміздің әдеби шығармаларымызбен танысу, өзара түсіністік пен достығымызды жақындата түседі. Өзге халықтың мәдениетімен танысу - ол адами құндылықтың ең жоғары деңгейіндегі байланыс. Рахымжан Отарбаев біраз халықтың мәдени қосушысы, әдеби көпірі бола білді", - деп түйіндеді Жанар Колбачаева. Іс-шара осы кеште жиналған Рахымжан Отарбаевтың достары, әріптестерінің жазушы туралы естеліктерімен, жылы лебіздерімен жалғасты.
Оқырманды шешендікке тәрбиелеп, халқымыздың асыл мұраларын игеріп, рухани тұрғыдан дами түсулеріне қызмет ететін құнды дүниелері дүйім жұртқа тарайды деген сенім сөздері естілді. Бұл жоба жаңаша негізінде ұсынған еңбектің идеяларды тәуелсіз еліміздің жарқын әдебиетін барша көркемдікпен шет елдердің оқырмандарына таныстыру және қазақ мәдениетінің болашағына қызмет еткізу орайында жасалған. Есмұхан Обаев айтқандай, "Рахымжан Отарбаев - шағын әңгімелерінде үлкен ой айта алатын кесек жазушы". Қазақ әдебиетінен өзіндік орнын алған жазушының жарқын бейнесі барша оқырман қауымның жүрегінде сақталатынына сенімдіміз.
Рахымжан Отарбаев Қазақстан Жазушылар одағы Басқармасының мүшесі, республикалық Махамбет Өтемісұлы атындағы сыйлықтың, Халықаралық Айтматов атындағы сыйлықтың иегері, Халықаралық Айтматов атындағы академияның академигі, Халел Досмұхамедов атындағы Атырау университетінің құрметті профессоры, Атырау облысы, Құрманғазы ауданының Құрметті азаматы. Қазақстанның Еңбек сіңірген қайраткері, "Құрмет" және "Парасат" орденімен марапатталған.
Tengrinews.kz
Сурет:дереккөз
