Қ.Қарашаұлы атындағы Сарайшық орта мектебінде отбасындағы бала тәрбиесіне қатысты ата-аналармен кездесу өткізілді.
Онда баланың бойына жақсы әдеттері сіңіріп өсу жолдарын ата-аналармен бірлесіп қарастыру, сондай-ақ білім беру мазмұнын жаңарту бойынша жүргізіліп жатқан мемлекеттік саясатты талқылауға ата-аналар қауымдастығын да кірістіру мақсаты көзделді. Күн тәртібіндегі бірінші мәселеге орай мектеп директорының міндетін атқарушы Ғ.Жексенбаева жаңартылған білім беру мазмұнымен жаңа 2018-2019 оқу жылында жаңадан мектепке қабылданған, ауысып келген білім алушыларға мектеп пен ата-ана арасында келісім-шарт жасалғаны туралы, мектеп жарғысы мен ішкі тәртіп ережелеріне сүйене отырып, шәкірттердің мектеп формасын киюін қатаң бақылауға алуын ескертті. Одан әрі ол оқу процесін цифрландыру, мектеп жоспарын таныстырды. Ата-аналар комитетінің төрайымы А.Мухамбетжанова «Баланың бас ұстазы-ата-анасы» тақырыбында баяндама жасап, онда мектептің отбасымен өзара қарым-қатынасы ата-ана беделіне құрмет көрсету, жанұяның рухани кемелдене түсуіне көмектесу, үй-ішінің балаларға оң ықпал туғызуына жәрдемдесу негізінде құрылуы тиістігін атап көрсетті.
Директордың тәрбие ісі жөніндегі орынбасары Д.Сапарова мектеп оқушыларын тәрбиелеудің негізі ретінде «Рухани жаңғыру» бағдарламасын іске асыру жөнінде 1 тоқсанда өткен іс-шараларға слайд арқылы кеңінен тоқталды. Ол балалардың көктемгі, күзгі, қысқы демалыс кезіндегі қауіпсіздігін қатаң қадағалауды, алда қаһарлы қыс айлары келе жатқанын баяндап, ата-аналарға демалыс уақытында жасөспірімдер мен балаларға өте сақ болуды тапсырды. Мектептің қамқоршылық кеңесінің төрайымы Г.Сүйінова қамқоршылық кеңес қызметімен таныстырып, отбасы мен мектептің өзара іс-қимылын күшейту мәселелерін қозғады. Залдан қойылған сауалдарға мектеп әкімшілігі, белсенді ата-аналар жауап қайтарды.
А.ҚУАНЫШҚАЛИЕВА.
