Мүмкіндігі шектеулі болса да, жігері шексіз жандардың спортқа деген құлшынысы, талпынысы мен қайсарлығы бізге үлкен үлгі. Олар үшін спорт – тек жарыс емес, өзін дәлелдеу, қоғамға үлес қосу, өмірге деген құштарлықтың көрінісі.
Наурыз айында Испанияның Плайя-д’Аро қаласында тірек-қимыл аппараты зақымданған спортшылар арасында пара үстел теннисінен ITTF World Para Future Costa Brava халықаралық чемпионаты өтті. 29 елден 164 қатысушы бақ сынаған бұл додада Қазақстан атынан 13 спортшы қатысты. Атырау облысынан қатысқан «Мүгедектер спорт клубының» спортшысы, Махамбет ауданының мақтанышы Аружан Ғиниятова аралас жұптық сайысында жүлделі 2-орын иеленді.
“Ер жүректілер” спорт клубының спортшылары ұлттық ойындар мен шахмат бойынша да жарқын жетістіктер тіркеді. Тоғызқұмалақтан Мырзабек Наурызбекұлы, Айна Жайсанбаева – 1 орын, Нәсіп Адайбаева, Мұхадия Қуангереев және Мұхаммедмәди Ерланұлы – 2 орын жеңіп алса, шахматтан Әсемгүл Габдуллина 1 орын иеленіп, барлығы да 4 жылда бір өтетін республикалық Спартакиадаға жолдама алды. Сонымен қатар, Мұхаммедмәди Ерланұлы жастар арасында ҚР чемпионатына қатысу мүмкіндігін жеңіп алды.
Мүмкіндігі шектеулі емес, мүмкіндігі мол жандар – осындай спортшылар арқылы анықталады. Олардың жеңісі – бүкіл елдің жеңісі. Бұл – ерік-жігердің, еңбектің және шынайы рухтың жемісі.
Қ.БАҒЫТ
