Президенттің биылғы жылды Жұмысшы мамандықтар жылы деп жариялағанын білеміз. Әрине, бұрын жұмысшы мамандығы аса қадірлі мамандықтар саналды. Барлық ауыл-елді мекендерде жұмысшыларға арнап тұрғын үйлер көптеп салынды. Мерекелерде қарапайым жұмысшылардың өзі үлкен марапаттарға ие болып, еңбегі бағаланып, орден-медальдар алып, алғыс хат, құрмет грамоталарымен марапатталды.
Биыл жұмысшы мамандық иелерінің еңбектері еленіп жатыр. Жазира Сарсенгалиеваның «Көктем гүлі» бөбекжайында жұмыс істегеніне де он үш жылдың жүзі болыпты. Қарапайым мамандықтың иесі болса да балабақшада еселі еңбек етіп келеді.
-Мен балабақшада көмекші тәрбиеші болып, еңбек етіп келемін. Қарапайым ғана мамандық иесі болсақ та балалармен жұмыс істеп, өз нанымызды тауып, отбасын асырап жүрген жайымыз бар. Президент биылғы жылды Жұмысшы мамандықтар жылы деп жариялап, жұмысшылардың еңбектері еленіп, түрлі марапаттарға ие болып жатыр. Жуырда мен де Атырау облысы білім және ғылым қызметкерлері кәсіптік одағы қоғамдық бірлестігінің Алғыс хатымен марапатталып, зор қуанышқа кенелдім. Менің бұл тұңғыш марапатым еді. Бұл мен үшін – үлкен мәртебе. Қарапайым еңбегімнің жанғаны, бағаланғаны деп білемін, -дейді Жазира бізбен әңгімесінде.
Атырау облысында өмірге келген Жазира Қ.Сәтпаев орта мектебін бітірген соң 2003-2008 жылдары Атырау инженерлік-гуманитарлық институтына оқуға түсіп, оны ойдағыдай бітіріп шыққан. Жазира 2009 жылы Әсетпен шаңырақ құрып, Жалғансай ауылына келін болып түскен. 2013 жылы «Көктем гүлі» бөбекжайына көмекші тәрбиешілік жұмысқа орналасқан. Бүгінде ауылдың абыройлы келіні атанған Жазира балабақшадағы жұмысына мұқият, өзіне тапсырылған қызметтерді тез атқаруға тырысады.
Балабақша меңгерушісі Динара Асылбекқызы да Жазира туралы оң пікірде. Өз ісінің маманы екенін, тындырымды, пысық, қандай тапсырманы да орындайтынын еске салды.
Отбасында жолдасы Әсет екеуі Адина есімді қызды тәрбиелеп отыр. Ол Жалғансай орта мектебінің 8-сынып оқушысы.
Еңбегі бағаланған қарапайым еңбек адамы Жазираға алдағы уақытта да жаңа табыстарға жете беруіне тілектеспіз.
А.ҚУАНЫШҚАЛИЕВА
