Дәл осындай ұранмен аудандық Жастар ресурстық орталығы жанынан құрылған «Ottegi» волонтерлік тобы ауданда игі істерге өз үлестерін қосуда. Қайырымдылықты қарапайым дүниелерден де бастауға болатынын дәлелдеген волонтерлық топ аудан кәсіпкерлерін де осы жолда біріктіріп жүр. Жуырда бір күнде бірнеше акцияны бастаған олар ауылдың жас- кәрісінен алғыс алып та үлгерді.
Алдымен, Махамбет ауылындағы «Тұмар», «Нұрайым», «Мандарин», «СулмартШоп» сынды азық-түлік дүкендерінде тегін нан таратылып, кейін осы топтың бастамасымен «Тегін такси» күні бойы тұрғындарға қызмет көрсетті.
Сонымен қатар, қордың жұмысын жандандыру мақсатында 5 қыркүйек — Халықаралық қайырымдылық күні өткен «QUIZLAND» интеллектуалды сайысының №13 ойынынан түскен қаражат та осы «Ottegi»-нің есепшотына аударылды. Жақсылықты жария да, жасырын да жасап жүретін жомарт жандардың, кәсіпкерлердің қосқан үлесінің арқасында алғашқы жиналған қомақты қаражатқа көпбалалы бір әкеге велосипед сыйға тартылды.
Осындай жақсы бастаманың басы- қасында жүрген Жастар ресурстық орталығының басшысы Ақжол Қонысбаев ерікті топтың жұмысын қолдан келгенше тоқтатпай, ауқымды қайырымдылық шараларға бағыттаймыз деп отыр.
«Ottegi»– осы ауданның белсенді жастарының идеясымен, бастамасымен құрылған шағын құрам. Мұнда ерікті, жомарт, айналасына қуаныш сыйлауға асығып тұратын жүрегі кең жастар жиналған. Сонымен қатар, ауылымыздың белсенді кәсіпкерлері де атсалысып жатыр. Мақсатымыз - Махамбет ауданына қарасты ауылдарды аралап, апта сайын мұқтаж жандарға азық-түлік тарату, «Мектепке жол» акцияларында бірнеше отбасының балаларын киіндіру, науқас, мүмкіндігі шектеулі, жалғызбасты жандарға қамқорлық көрсету. Осындай істеріміз арқылы басқаларды да жақсылықты жарыса жүріп жасауға шақырғым келеді. Ауылдың азаматтары осындай абыройлы істе де ауызбіршілік танытып, қарапайым халыққа көмектесуге мейлінше үлес қосады де сенеміз!, - дейді аудандық ЖРО басшысы А.Қонысбаев.
А.САТАЕВА
