«ҚР Ішкі істер министрлігі ведомстволық жоғары оқу орындарына оқуға шақырады» тақырыбында жалпы білім беретін орта мектеп оқушыларымен кездесу өтті. Іс-шараға облыстық полиция департаменті тәрбие және кадр жөнінде басқармасының аға инспекторы, полиция майоры Қуандық Мұратбекұлы, білім бөлімінің әдіскерлері, мектеп оқушылары мен ата-аналар қатысты.
Кездесуге қатысқан ҚР І ІМ М.Бөкенбаев атындағы Ақтөбе заң институтының жоспарлау және бақылау бөлімінің инспекторы, полиция лейтенанты Адамкелді Аманбайұлы сөз алып, оқу орны туралы әңгімеледі. Әскери оқу орны туралы бейнеролик те көптің көңілінен шықты. ҚР ІІМ Б.Бейсенов атындағы Қарағанды академиясы криминалистика кафедрасының аға оқытушысы, полиция капитаны Наргиз Болатбекқызы да әріптестерінің ойын жалғап, академияның артықшылықтарын атап өтті.
ҚР ІІМ М.Есболатов атындағы Алматы академиясының құқық қорғау қызметін басқару кафедрасының бастығы, полиция полковнигі Майя Болатқызы мұнда ерлер ғана емес, қыздар да көп оқитынын, академия цифрлық криминалистика, киберқылмысқа қарсы күрес, криминалды полиция мамандарын даярлайтынын еске салды. Осы академияның әкімшілік-құқықтық пәндер кафедрасының доценті, полиция майоры Жұлдыз Ерланқызы да академияға түсуге құштар жас түлектерге құжат тапсыру, конкурстық кезеңдерден өту туралы кеңес берді.
– Барлық оқуға қабылданған курсанттар тегін оқиды. Ұлдар Отан алдындағы борышын да осында өтей алады. Академиядан 40-тан астам генерал шықты. Бұл академия – жаңа форматтағы полиция органдары қызметкерлері, ұйымдасқан қылмыс, экстремизмге қарсы күрес, киберқылмысқа қарсы күрес мамандары, әсіресе, әлемдік тәжірибеге сай цифрлық криминалистер дайындайтын жалғыз әскери жоғары оқу орны,- деді Ж.Ерланқызы.
Алматы академиясының тыныс- тіршілігін бейнелейтін бейнеролик арқылы танысқан түлектер полиция органдары саласына аса қызығушылық танытты. Сала мамандары оқушылар арасында түрлі ойындар ойнатты. Мәселен, «Қимылды қайтала» ойынына жеті адам қатысып, сыйлыққа ие болды. Бұдан басқа «Тапсырмалар», «Ойлан, тап!», «Полиция болғым келеді» ойындарына да оқушылар белсене қатысып, оларға кәдесыйлар табысталды. Болашақта сақшы, тергеуші, құқық қорғау, жол полициясы маманы боламын деушілер қатары көп. Бұл мамандықты қалаушылар арасында қыздар жағы басым. Кездесуге қатысқан ұл-қыздар өз ойларын ашық айтып, елге өз үлесін қосқысы келетінін, бүгінгі таңда қажет мамандық екенін, әділдік пен шындық жолында еңбек етуді армандайтынын жеткізді.
А.ҚУАНЫШҚАЛИЕВА
