Тәуелсіздік күні бір топ махамбеттіктер қуанышқа кенелді.
Әлеуметтік аз қамтылған отбасыларды баспанамен қамту – егемен ел атанғалы бері жасалып жатқан игілікті жұмыстардың бірі. «Nur Otan» партиясының сайлауалды бағдарламасын іске асыру жөніндегі жол картасы аясында биыл елімізде 17 млн шаршы метр тұрғын үй салу жоспарланған болатын. Оның ішінде әлеуметтік осал топ санатындағы отбасылар үшін тұрғын үйді пайдалану көлемі жылына шамамен 10 мың пәтерді құрайды.
Осы тұста Махамбет ауданында «Nur Otan» партиясының сайлауалды бағдарламасын орындау мақсатында көпбалалы үш отбасыға, сондай-ақ жетім және ата-анасының қамқорлығынсыз қалған балаларға, зейнеткерге, толық емес отбасыларға баспананың кілті табысталды. Баспаналы болу бақытына ие болған жанұялардың қуанышын бөлісуге облыс әкімінің орынбасары Қайрат Бекенов келіп, жүрекжарды лебізін білдірді.
– Облыста әр түрлі бағдарламалар бойынша жобалар іске асырылуда. Биылғы жылдың өзінде Махамбет ауданында жобалардың жүзеге асыруға 4 млрд-тан астам қаржы бөлінді. Оның ішінде ауылдарға жол салу, инфрақұрылым жүргізу, спорт нысандарын салу, мемлекеттік бағдарлама шеңберінде аз қамтылған отбасыларды үймен қамту және өзге де шаралар бар. Бүгінгі Тәуелсіздік күні қол жеткізіп жатқан үйлеріңіз құтты болсын, іші тек қуанышқа толы болсын,-деді облыс әкімінің орынбасары.
Жоғарыда аталған санаттарға жататын Элеонора Аюсина мен Мөлдір Аймағамбеттің отбасыларына екі пәтерлік тұрғын үйді облыс әкімінің орынбасары өзі табыстады. Пәтер кілттері табысталғаннан кейін баспананың салтанатты жағдайда лентасын еңбек ардагері Қобыланды Сисенов пен білім беру саласының ардагері Болған Масалимова қиды. Жаңа пәтердің іші кең, жап-жарық, газы, суы келіп тұр.
Салтанатты шарадан кейін облыс әкімінің орынбасары демеушілер көмегімен көмірқышқыл газын анықтайтын датчиктер орнатылған үйде болып, жағдайымен танысып, аудан әкімдігі мен Төтенше жағдайлар бөлімінің жұмыстарына оң бағасын берді.
Қ.АЙТҚАЛИЕВ
Суреттер автордікі
