Қазіргі қоғамда тәуелділіктің жаңа түрлері көбейіп келеді. Соның бірі – лудомания, яғни құмар ойындарға тәуелді болу. Бұл тек ойын-сауық ретінде басталып, кейін адамның өміріне, психологиясына және болашағына кері әсер ететін күрделі мәселе. Лудомания – жеке адамның ғана емес, бүкіл қоғамның проблемасына айналып отыр.
Лудоманияның басты себебі – жеңіл жолмен ақша табуға деген қате түсінік пен эмоциялық тәуелділік. Құмар ойындар адамға уақытша қуаныш пен үміт сыйлағанымен, ұзақ мерзімде үлкен шығынға ұшыратады. Лудоман адам өз әрекетін бақылай алмай, оқуына, жұмысына, отбасымен қарым-қатынасына немқұрайлы қарай бастайды. Кей жағдайларда бұл қаржылық қиындықтарға, психологиялық күйзеліске әкеледі. Әсіресе жасөспірімдер үшін лудомания өте қауіпті, себебі олардың мінезі мен өмірлік көзқарасы әлі қалыптасу үстінде.
Лудомания – алдын алу мен түсіндіруді қажет ететін маңызды әлеуметтік дерт. Бұл мәселемен күресу үшін адамдардың қаржылық сауаттылығын арттырып, құмар ойындардың зияны туралы ашық айту қажет. Әр адам өз уақытын пайдалы істерге жұмсап, болашағына жауапкершілікпен қараса, лудоманиядан аулақ болуға болады. Саналы таңдау – жарқын болашақтың кепілі.
Г.Сәдуақас
