Халықаралық волонтерлер күні қарсаңында Азаматтық орталықтың бастамасымен ұйымдастырылған «Біз таңдаған жол» тақырыбындағы іс-шаралар өз мәресіне жетті. Қорытынды жиын «Сарайшық» мемлекеттік тарихи-мәдени музей-қорығында өткізіліп, оған облысқа қарасты жеті ауданнан 40-қа жуық күміс волонтер қатысты.
Шара аясында «Біз таңдаған жол: жақсылыққа бағыт» тақырыбында семинар-тренинг өткізіліп, оны журналист, медиа-тренер, сондай-ақ 2020 жылдан бері ҚР Президентінің жанындағы Мемлекеттік басқару академиясының Ақтөбе және Батыс Қазақстан облыстары бойынша штаттан тыс тренері болып саналатын Салтанат Оңғар жүргізді. Семинар барысында қатысушыларға көшбасшылық, эмоционалдық интеллект, сенімді сөйлеу дағдылары, келісімшарт жүргізу, тиімді коммуникация, харизма, дағдарыс кезеңіндегі коммуникация сияқты бағыттар бойынша шеберлік сағаттары ұсынылды. Сонымен қатар медиа-тренер волонтерлік бастамаларды ілгерілету мен командамен тиімді жұмыс жүргізу тәсілдері туралы тәжірибесімен бөлісті.
Волонтерлік қозғалыстың дамуына серпін беру, қатысушылардың кәсіби құзыреттерін арттыру және қоғамда волонтерлік қызметтің маңызын көтеру мақсатында ұйымдастырылған жиын барысында «Үздік күміс волонтер» жобасының жеңімпаздары арнайы марапатталды. Семинар-тренингке қатысқан барлық волонтерлерге сертификаттар ұсынылды.
Жоба бағдарламасына сәйкес, қатысушылар «Сарайшық» мемлекеттік тарихи-мәдени музей- қорығына экскурсия жасап, ондағы археологиялық және этнографиялық мұралармен жан-жақты танысты. Археологиялық қазба жұмыстары нәтижесінде табылған жәдігерлерді тамашалап, жаңғыртылған орталықтың көрме залдарын аралап көрді.
Б.САПАРОВА
