ҚҰРМАНҒАЗЫ АУДАНЫНЫҢ ТЕҢІЗ АУЫЛЫНДА АЛҒАШ РЕТ ҰЙЫМДАСТЫРЫЛҒАН «LOTUS FEST – 2025» ХАЛЫҚАРАЛЫҚ МӘДЕНИ-ТУРИСТІК ФЕСТИВАЛІ ӨҢІР ТУРИЗМІ МЕН ҰЛТТЫҚ МӘДЕНИЕТТІҢ ЖАРҚЫН КӨРІНІСІНЕ АЙНАЛДЫ. ЕРЕКШЕ ТАБИҒИ ҚҰБЫЛЫС – ҚИҒАШ ӨЗЕНІНІҢ САҒАСЫНДА ШІЛДЕ МЕН ТАМЫЗ АЙЛАРЫНДА ЖАЙҚАЛА ГҮЛДЕЙТІН ЛОТОС АЛҚАПТАРЫ ФЕСТИВАЛЬДІҢ БАСТЫ НЫСАНЫ БОЛДЫ.
Қазақстанда лотос табиғи түрде тек Құрманғазы ауданында өсетіндіктен, бұл шара еліміз үшін теңдесі жоқ оқиға ретінде бағаланды. Лотос гүлінің нәзіктігі мен сұлулығын өз көзімен көруге алғашқы күннен-ақ 8000-ға жуық турист келген. Жалпы фестиваль барысында 3000- нан астам турист арнайы тіркеліп, Қиғаш бойындағы алқызыл алқапты тамашалауға 30-дан астам қайық қызмет көрсеткен.
Фестиваль ресми түрде Атырау облысы әкімінің орынбасары Дарын Шамұратовтың қатысуымен ашылды. Ол өз сөзінде бұл шараның еліміздегі ішкі және шекара маңындағы туризмді дамытуға, мәдени байланысты нығайтуға серпін беретінін атап өтті. Сондай-ақ, ол облыс әкімі Серік Шәпкеновтің құттықтау лебізін жеткізді.
Мерекелік шара этноауылдан бастау алды. 20-дан астам ақшаңқан киіз үй тігілген этноауылда қонақтарға қазақ халқының салт-дәстүрі таныстырылып, ұлттық тағамдар мен қолөнер бұйымдарының жәрмеңкесі ұйымдастырылды. Құрманғазы ауданынан – 25, облыстың басқа өңірлерінен – 10, ал көршілес Ресейден 3 кәсіпкер өз өнімдерін ұсынды. Туристер ұлттық нақыштағы заттарға, тағамдарға, әсіресе қазақтың кәуәп, бауырсақ, қымыз секілді дәмдеріне қызығушылық танытты.
Фестиваль аясында өткен мәдени бағдарламалар да әсерлі болды. Астрахань облысынан келген Құрманғазы атындағы Өңірлік мәдениет орталығы мен жергілікті өнерпаздар театрландырылған көріністер мен концерттік қойылымдар ұсынды. Фестивальдің алғашқы күні танымал әнші Ғазизхан Шекербековтің қатысуымен өткен гала-концерт пен отшашумен аяқталды.
Ұлттық спорт түрлерінен жарыстар да ерекше қызығушылық тудырды. Қол күресі, қазақ күресі, садақ ату, асық ату және арқан тарту сайыстарына Атырау қаласы мен бірқатар аудандардан келген спортшылар қатысты. Әсіресе, 80 келіге дейінгі және одан жоғары салмақта белдескен балуандардың бәсекесі қызу өтті. Сонымен қатар, «Алыптар сайысында» 11 спортшы күш пен төзімділік сынағында 7 түрлі жаттығу бойынша бақ сынап, үздік атанған қатысушы қыркүйек айында Алматыда өтетін «Ақбидай» республикалық турниріне жолдама жеңіп алды.
Фестиваль барысында фотозоналар, қайықпен серуендеу, атпен қыдыру, ұлттық ойындар, гастрономиялық байқаулар мен спорттық турнирлер өткізілді. Суретшілер көрмесі де өтіп, табиғатпен үйлескен өнер туындылары көпшіліктің көңілінен шықты.
«LOTUS FEST – 2025» – өңірдің туристік әлеуетін арттырып қана қоймай, ұлттық мұра мен табиғи байлықты насихаттаудың тамаша үлгісіне айналды. Келушілер үшін Атырау қаласынан арнайы автобустар ұйымдастырылып, логистика мәселесі де оңтайлы шешілді.
Айта кету керек, лотос гүлі тамыз айының соңына дейін гүлдейді. Демек, Қиғаштың ғажайып табиғатын тамашалап, ерекше сұлулық әлеміне сапар шегемін деген туристер үшін әлі де уақыт бар.
Қ.АЙТҚАЛИЕВ
