Президент Қасым-Жомарт Тоқаев Жолдауында атап өткен «Келешек мектептері» ұлттық жобасы – білім саласын түбегейлі жаңғыртуға бағытталған аса маңызды бастама. Бұл – еліміздің ертеңі саналатын өскелең ұрпаққа сапалы білім беру жолындағы нақты әрі нәтижелі қадамдардың бірі.
Себебі жаңа мектептердің салынуы тек оқушы орнының тапшылығын жоюмен шектелмейді. Бұл – білім беру сапасын арттырып, балаларымыздың заманауи талапқа сай жағдайларда білім алуына жол ашады. Жобаның аясында 217 мектептің салынып, соның 150-і қазірдің өзінде іске қосылғаны – жұмыстың қарқыны жоғары екенін көрсетеді. Қалған мектептердің алдағы үш айда толық аяқталуы – мемлекет тарапынан білімге жасалып отырған үлкен қолдаудың айқын дәлелі.
Аудандағы мектептердің материалдық-техникалық базасын нығайту, жаңа оқу кабинеттерін, пәндік зертханаларды, спорт және шығармашылық алаңдарын қалыптастыру – тек білім сапасын емес, балалардың жан-жақты дамуын қамтамасыз етеді. Бұл өз кезегінде ауыл мен қала арасындағы білім теңдігін қалыптастыруға зор үлес қосады.
Мұндай жобалардың жүзеге асуы – ауданның әлеуметтік-экономикалық дамуына да оң әсерін тигізеді.Жаңа мектептердің салынуы жаңа жұмыс орындарының ашылуына, жас мамандардың ауылға келуіне, жергілікті инфрақұрылымның жақсаруына мүмкіндік береді.
«Келешек мектептері» ұлттық жобасы – еліміздің болашағына жасалған стратегиялық инвестиция. Аудан тұрғындары бұл бастаманы толық қолдайды және жастарға заманауи, қолжетімді, сапалы білім беру мақсатында атқарылып жатқан ауқымды жұмыстардың жалғасатынына сенімді.
Ж.МАҚСОТ
