Әр жылдары мектеп бітірген түлектердің білім ордаларындағы соңғы қоңырау қарсаңында қайырымдылық жасап, мұқтаж жандарға көмектесуі, өз ауылының көркейіп-көріктенуіне үлес қосуы дәстүрге айналып келеді. Осындай қайырымдылық шарасын Есбол ауылдық округіндегі Қосарал орта мектебінің 2003 жылғы түлектері жүзеге асырды. Мектеп бітіргендеріне 20 жыл толған түлектер  туған ауылына саябақ салып берді.

2003 жылғы түлектер  тарту еткен саябақтың ашылуы салтанаты жағдайда өтті.  Саябақтың ашылу салтанатында ауыл әкімі Алмас Ұзақбайұлы туған жерге тағзым етіп, туған ауылды көркейтіп, туған елдің  дамуы мен гүлденуіне ат салысқандары  үшін азаматтарға алғыс білдірді.

Сондай-ақ аудандық Аналар кеңесінің төрайымы Жібек Шамалиқызы сөз алып :

«Есбол ауылы қашанда іргесінің беріктігімен, ымырасының  бекемдігімен, еңсесінің биіктігімен өзге ауылдарға үлгі болып келеді. Қосаралдың қара шаңырағынан осыдан 20 жыл бұрын түлеп ұшқан түлектер бүгін ауылға керемет сый жасағанына куә болдық. Біз осындай түлектерімізді мақтан етеміз. Елге болсын деп тұратын шәкірт тәрбиелегенімізге  қуаныштымыз. Бұл игі іс кейінгі жастарға өнеге болары сөзсіз, - деді. Ауыл ақсақалдары жастарға батасын берді. Түлектер өз қолдарымен саябаққа алғашқы көшет отырғызды.

Б.Сүйеуова