Соңғы жылдары аудан орталығының үлкеюіне орай ауылішілік жолаушылар тасымалдайтын автобус маршруттары шығарылып, тұрғындар үшін аялдамалар да орнатылып берілді. Қазіргі таңда аудан бойынша барлығы 47 аялдама болса, оның 39-ы аудан орталығында, қалған 8-і ауылдық округтерде орнатылған.
Аялдамалар тиісті стандарттарға сай жасақталып, күннен, жаңбырдан қорғайтын шатыры, ыңғайлы орындықтары қарастырылған. Әйтсе де, жолаушылар үшін қолайсыздық тудырып тұрған бір ғана жайт бар. Ол – аялдамалардың айналасындағы асфальттау жұмыстарының әлі күнге аяқталмай отырғаны. Бұл мәселеге орай аудандық тұрғын үй- коммуналдық шаруашылығы, жолаушылар көлігі және автомобиль жолдары бөлімі мамандарына сауал жолдап, төмендегідей жауап алдық.
- Осыдан екі жыл бұрын аудан орталығында Махамбет ауылішілік жол салудың бірінші кезеңі басталып, жоба аясында аудан орталығына 39 жаңа аялдама орнатылған болатын. Жауапты мердігер мекеме «АИС» ЖШС-і аялдамалардың айналасын асфальттау жұмыстарын алдағы тамыз айында бастағалы отыр. Бұл жұмыстар жыл аяғына дейін толықтай аяқталатын болады. Өздеріңізге белгілі, биылғы жылы Махамбет ауылішілік жол салудың 3-ші кезеңі басталды. Ол 18 шақырымды құрайды. Осы жоба аясында тағы 10 жаңа аялдама орнату жоспарлануда, - дейді тұрғын үй-коммуналдық шаруашылығы, жолаушылар көлігі және автомобиль жолдары бөлімінің бас маманы Е.Жұмашев.
Б.САПАРОВА
