Сартоғай-Махамбет-Атырау бағытында жолаушылар тасымалдайтын автобусқа бүгінде тұрғындар арасында сұраныс жоғары. Осыған дейін жолаушыларға билет сату бір бағытта жүзеге асса, енді арнайы бағдарламаның көмегімен онлайн билет екі бағытқа да қолжетімді.
Сонымен қатар, көпшіліктің ұсынысымен «Бизнес инкубатор» ғимаратынан оффлайн билет сату кассасы да жұмыс жасап тұр. Іші жылы, жайлы, бастысы жүру уақыты реттелген, діттеген жерге жеткізетін автобустар әсіресе, көп балалы отбасыларға қолайлы. Алайда, соңғы уақытта автобустың аялдамаға тоқтауына қатысты наразылық білдіріп, аудан әкімдігінің телеграмм чатына жазатын жолаушылар көбейіп кетті. Осы ретте «Автобус неге тұрғындар айтқан аялдамаға тоқтай алмайды?» деген сауалды қоғамдық көліктің жүргізушілеріне жолдадық.
ИП «Қосыбаева» ұсынған Сарытоғай- Махамбет-Атырау» бағытындағы жолаушылар тасымалына арналған автобустың жүргізушісі С.Жұмабаев:
– Қазіргі таңда жолаушылар тасымалына арналған автобусымыздың тоқтауға белгіленген 5 аялдама орны бар. Оның үшеуі Махамбет ауылында, екеуі Сартоғай ауылына қарасты. Ал, тұрғындардың талабы «Жайық шұғыласының 50 жылдығы» көшесі бойындағы бағдаршамға жақын аялдамаға тоқтау болып отыр. Қазақстан Республикасының автомобиль көлігі туралы заңына сәйкес аялдама бағдаршамға дейін 30-35м, бағдаршамнан кейін 40 м ара қашықтықта салынуы керек. Бұл аймақта сол заңдылық сақталмаған. Аялдаманың автобус тоқтайтын алаңы тар. Жолаушыларды түсірген жағдайда қарсы бағыттағы көлік құралдарына кедергі келтіріп, жол-көлік оқиғасы туындау қаупі бар. Сондықтан автобус тек аялдамасы қолайлы, алаңқайы ашық жерлерге ғана тоқтап жүр,-дейді.
Аудан орталығында өткен жылы аялдамалар салынып бастады. Мемлекет- тік тапсырыс беруші аудандық тұрғын үй – коммуналдық шаруашылығы, жолаушылар көлігі және автомобильжолдары бөлімі. Осы ретте бөлім басшысы Асылхан Шакимовтың да жауабын тыңдап көрдік.
– Автобус аялдамаларының салынуы жоспар бойынша 2024-2025 жылдарға арналған ауылішілік автомобиль жолдарының сметалық құжатына енгізілген. Осы ретте жол салу жұмысы ағымдағы жылдың маусым айына дейін жалғасатындығын ескере отырып, аялдамаларды тапсырыс беруші толық қабылдамағанын ескертеміз. Асфальт жабындылары әлі төселмеген. Сонымен қатар, егер Қазақстан Республикасының автомобиль көлігі туралы заңына сәйкес аялдамалардың орналасу аймағы, ара қашықтығында қателіктер орын алса, арнайы комиссия тексере алады,-деп жауап берді А.Шакимов.
А.ҚАНАТБАЙҚЫЗЫ
