Жұмысшы мамандықтарының бірі-аспаздық болып табылады. Мен 1993 жылы Таңдай орта мектебін бітірген соң Атырау(Гурьев) ауыл ауылшаруашылық техникумына оқуға түсіп, оны 1997 жылы бітіріп шықтым. 1998-2000 жылдары компьютерлік курс, аспаздық мамандықты меңгеріп шықтым.
Еңбек жолымды Таңдай орта мектебінде 2000-2006 жылдары асханада аспаз болып бастаған едім. Ал 2008 жылдан бері «Райхан гүлі» бөбекжайында аспазшылық қызметтемін. «Жастайымнан анамның қасында жүріп, ас үйде ас пісіруге құмар едім. Қазіргі уақытта аспаздыққа тек қыздар ғана емес, ұлдар да қызығатын болды. Қала мейрамханаларында, дәмханаларында ас үйде аспаз болып, ұлдардың жүретінін жиі байқап жүрмін.
Аспаздық-қиын жұмыс. Балабақшадағы балақайларға дәмі тіл үйіретін ас-ауқат, ұлттық тағамдар, тәтті торт, бәліштер, салаттарға дейін дайындауға тырысамын. Шын пейілмен,сүйіспеншілікпен жасалған тағам қашанда жұртшылықтың көңілінен шығады.
Кез келген адам аспаз бола алмайды. Оған икемі, қызығушылығы болса ған ісі өнеді. Өз басым жұмысыма үлкен жауапкершілікпен қараймын. Ас үйдің өз заңы бар. Аспаз бір жағынан қауіпсіздік, санитарлық нормалардың қатаң сақталуын қадағалайды. Ас үйде аспаз болу оңай шаруа емес. Жалпы аспазды ас үйдің сиқыршысы деп тегін айтпайды.
Жолдасым Қайырбек екеуміз шаңырақ құрып, бүгінде екі ұл, үш қыз тәрбиелеп отырмыз. «Еңбек ер атандырады» деп тегін айтпайды. Шүкір, еңбегім еленіп, азын-шоғын марапаттарым да бар. Мәселен, 2016 жылы аудандық кәсіподақтың «Алғыс хатын» алсам, 2019 жылы Бақсай ауылдық округ әкімінің алғыс хатымен марапатталдым.
Аспаздық мамандықты меңгергеніме еш өкінбеймін. Мамандығым-мақтанышым десем де болады.
Алтын Жантілекова,
«Райхан гүлі» бөбекжай-бақшасының аспазы
