30 тамыз – Қазақстан Республикасының Конституциясы күніне орай университет қабырғасында дәстүрлі «Мен Конституцияны жатқа білемін!» конкурсы ұйымдастырылды. Биылғы сайыс аталмыш жобаның сегізінші мәрте өткізілуімен ерекшеленді.
Конкурстың негізгі мақсаты – жастардың құқықтық мәдениетін арттыру, Ата Заңға деген құрметін күшейту және студенттердің білімге деген ынтасын қолдау. Байқауға 40-тан астам студент қатысып, өздерінің заңға қатысты білімі мен жаттау қабілеттерін сынап көрді.
Қазылар алқасы қатысушылардың дайындық деңгейін, мәнерлі оқуын және заң баптарын толық жатқа айтуын бағалай отырып, үздік үштікті анықтады:
• 🥉 3 орын – 4 курс студенті Мәрлен Дошқан
• 🥈 2 орын – 3 курс студенті Аян Әсетов
• 🥇 Бас жүлде – 3 курс студенті Дана Қуат
Жеңімпаздар арнайы дипломдармен және сыйлықтармен марапатталды.
Іс-шара барысында ұйымдастырушылар Қазақстан Конституциясының қоғамдағы маңызына тоқталып, жастардың құқықтық сауаттылығын арттыру – ел болашағы үшін маңызды екенін атап өтті.
«Бұл конкурс – студенттердің Ата заңымызды құрметтеп, құқықтық білімін тереңдетуге жол ашатын маңызды дәстүрге айналды. Жастардың белсенді қатысуы олардың ел тәуелсіздігіне деген сүйіспеншілігін және жауапкершілігін көрсетеді», – дейді ұйымдастырушылар.
Конституция күніне арналған байқау студенттердің білімін шыңдап қана қоймай, олардың патриоттық сезімін күшейтіп, мемлекеттік мерекенің маңызын кеңінен ұғындыруға ықпал етті.
Ақтілек Базарбаева
