Тәуелсіздік күніне орай халық жазушысы, Еңбек Ері Мұхтар Шахановтың 80 жылдық мерейтойы аясында “ШАХАНОВ ШЕРУІ. СТУДЕНТТЕР ЖЫРЛАЙДЫ” поэзия кеші өтті.
Іс-шараны Сафи Өтебаев атындағы Атырау мұнай және газ университеті облыстық білім беру басқармасы қолдауымен ұйымдастырды. Поэзия кешіне осы университеттің және облыстағы орта кәсіптік техникалық колледж студенттері қатысты. Шаханов шеруіне қатысушыларды құттықтау сөзімен ашқан Сафи Өтебаев атындағы мұнай және газ университеті ректоры Гүлзада Тәңірбергенқызы:
"Техникалық бейіндегі Сафи Өтебаев университеті жоғары оқу орындарының үшінші миссиясы - қоғамның өркендеуіне үлес қосу, рухани-мәдени әлеуетін көтеру жұмысына маңыз беріп келеді. Кеш мақсаты - әлем таныған ақынның шығармашылығын дәріптеу, орта кәсіптік техникалық колледждердің студенттері арасында шығармашылық байланыс орнату. Бұл шара арқылы біз техникалық оқу орындарының білімгерлері де рухани жағынан бай, шығармашылыққа да жақын, өнерлі екенін көрсеткіміз келді, - деді.
Іс-шараға Apec Petrotechnic Жоғары колледжі, Саламат Мұқашев атындағы Атырау политехникалық колледжі, Каспий өңірінің қазіргі заманғы жоғары колледжі, Оңайбай Көшеков атындағы Атырау аграрлы-техникалық колледжі, Атырау Бизнес жəне Құқық колледжі, Дина Нұрпейісова атындағы кіші өнер Академиясы студенттері жастарынан құралған 200ге жуық студент қатысты. Олар ақынның тәуелсіздік, желтоқсан тақырыбына арналған отты жырларынан шашу шашты.
Кеш қонағы: - "Сарайшық" журналының бас редакторы, белгілі ақын, журналист Гүлзада Ниетқалиева болды. Ол Мұхтар Шахановтың "Нарынқұм зауалы" поэмасын жатқа айтып, өлеңсүйер көпшілікті тәнті етті. "Нарынқұм зауалы" – ақын Мұхтар Шахановтың Махамбет Өтемісұлы туралы жазған жыры. Бұл поэма Махамбеттің күрескерлік айбынын, ұлттық болмысын, ақындық тереңдігін, азаматтық парасатын танытатын әйгілі шығарма. Поэзия кешінің шымылдығын «Сармат» республикалық этно-фольклорлық ансамблі рухты композицияларымен ашты.
Іс-шарада, сондай-ақ Ғабдол Сланов атындағы Атырау облыстық ғылыми әмбебап кітапханасының “Ғасырдың ғаламат ақыны” кітап көрмесі ұйымдастырылды. Оған ақынның әр жылдары жарық көрген кітаптары топтастырылып, қойылды.
Іс-шара соңында қатысушылар бағалы сыйлықтар және алғыс хаттармен марапатталды.
