Атырау облысы полиция департаментінің бастығы полиция генерал майоры Оңал Бекеев Атырау қаласындағы №2 учаскелік полиция пунктінің жұмыс барысымен танысты. Халықпен күнделікті тығыз қарым-қатынаста қызмет атқаратын учаскелік полиция инспекторларының қызметі, жүктемесі мен өзекті мәселелері назарға алынды. Кездесу барысында Департамент бастығы учаскелік инспекторлармен ашық форматта пікір алмасып, олардың ұсыныстары мен ой-пікірін тыңдады. Тұрғындардың қауіпсіздігін қамтамасыз ету, құқық бұзушылықтардың алдын алу және азаматтардың полицияға деген сенімін арттыруда учаскелік полиция қызметінің маңызы ерекше екені атап өтілді.
- Президент заң мен тәртіп мемлекет пен қоғамның ең басты қағидатына айналуы керектігін айқындап берді. Полиция қызметі азаматтардың мүддесіне бағытталып, ашықтық пен қолжетімділік қағидаттары негізінде жүзеге асырылуы тиіс. Тұрғындардың өтініш-шағымына жедел ден қою, профилактикалық жұмыстарды күшейту және сенімді диалог орнату басты міндетіміз - деді, өңірдің бас полицейі Оңал Бекеев.
Сонымен қатар, учаскелік полиция пунктінің материалдық-техникалық жағдайы, қызметтік тәртібі пен профилактикалық жұмыстардың сапасы қаралды. Тұрғындармен кері байланысты күшейту, тұрмыстық құқық бұзушылықтардың алдын алу және қоғамдық тәртіпті сақтау бойынша нақты міндеттер жүктелді.
