Атырауда өткен «Auyl Jastary» облыстық форумында Махамбет ауданының жастары ерекше белсенділігімен танылды. Екі күнге созылған ауқымды шарада аудан атынан барған жас көшбасшылар жаңа идеялар ұсынып, түрлі сессиялар мен мотивациялық кездесулерге қатысып, өз әлеуетін таныта білді.
18-19 қараша күндері ұйымдас- тырылған форум ауылдық елді мекендерден жиналған белсенді жастардың басын қосып, пікір алмасу алаңына айналды. Іс-шараға Орталық аппарат басшысының орынбасары Нұрхат Серікқалиұлы, Атырау облыстық филиалының төрағасы Нұртас Жарылғасынұлы, «Ауыл жастары» жастар қанатының төрағасы Дәурен Берікбайұлы мен мәслихат депутаттары қатысты. Сонымен қатар облыс орталығы мен жеті ауданнан келген жүзден астам жас форум жұмысына белсене атсалысты.
Форумның негізгі мақсаты – ауыл жастарының азаматтық белсенділігін арттыру, жаңа идеялар мен әлеуметтік бастамаларды қолдау, жас буынның кәсіби және тұлғалық дамуына серпін беру. Алғашқы күні жастар ұйымдарының көрмесі ұйымдастырылып, «Ауыл» партиясының өкілдері жастарды құттықтап, өз жобалары туралы баяндады.
Махамбет ауданынан барған өкілдер арасында белсенділігімен көзге түскен жастардың бірі – Аманжан Тілегенов.
– Форум жоғары деңгейде ұйымдастырылған. Мұндай ауқымды шараның Атырауда өтуі – біз секілді ауыл жастары үшін зор мүмкіндік. Партия өкілдері мен кәсіпкерлер ауылдағы жобалар жайлы айтып, тәжірибелерімен бөлісті. Түйгеніміз көп болды,- дейді ол.
Қазіргі таңда Аманжан Нұрланұлы «Ауыл» партиясының Махамбет аудандық филиалы «Жастар қанатының» төрағасы қызметін атқаруда. Форум аясында ол партияның 25 жылдық мерейтойлық медалімен марапатталды. Бұл – аудан жастарының белсенділігіне берілген жоғары баға.
Екінші күні қатысушылар «Жасанды интеллект», «Заманауи технологиялар» және «Ауыл кәсіпкерлігі» бағыттарындағы сессияларға қатысып, қазіргі заманғы үрдістермен танысты. Спикерлер қатарында Дәурен Сейітқалиев, Айкөркем Салауатқызы және Арнұр Саттығұлова жастарға мотивациялық ой-пікірлерін жеткізді. Әсіресе, жасанды интеллект саласындағы жаңа мүмкіндіктер мен ауыл кәсіпкерлігі бойынша берілген кеңестер жастардың қызығушылығын арттырды.
Форум барысында ауыл жастарына арналған зияткерлік сайыстар ұйымдастырылып, үздік нәтижеге қол жеткізгендер марапатталды. Сонымен бірге қатысушылар этнобірлестік өкілдерінің көрмесін тамашалап, өңірдің мәдени байлығымен танысты. «Auyl Jastary» облыстық форумы Махамбет ауданынан барған жастар үшін тәжірибе алмасуға, жаңа серпін алуға және өз бастамаларын жүзеге асыруға үлкен мүмкіндік берді. Аудан жастарының белсенділігі мен ынтасы ауыл болашағының жарқын екенін көрсетеді.
Қ.БАҒЫТ
